Kompania e njohur botërore e ushqimit, McDonald’s, e ka shkarkuar shefin ekzekutiv të saj, Steve Easterbrook, pasi ai kishte hyrë në një lidhje intime me një punëtore.
Gjiganti amerikan i ushqimit të shpejtë njoftoi se kjo lidhje ishte krijuar me pëlqimin të dyanshëm, por se Easterbrook i ka shkelur rregullat e kompanisë dhe ka shfaqur gjykim të dobët.
Në një letër dërguar stafit të kompanisë, biznesmeni britanik e pranoi se kishte hyrë në lidhje me punëtoren dhe tha se kjo gjë ishte gabim.
“Duke marrë parasysh vlerat e kompanisë, unë pajtohem me bordin se është koha të largohem”, shkroi ai.
Easterbrook, 52 vjeç, është i divorcuar. Ai fillimisht kishte punuar si menaxher i restorantit McDonald’s në Londër në vitin 1993 para se të merrte pozitë më të lartë në kompani më vonë. Në vitin 2015, ai u zgjodh shef ekzekutiv i rrjetit të famshëm.
Rregullat e kompanisë ua ndalojnë menaxherëve që të kenë marrëdhënie romantike me vartësit e tyre.
Detyrën e shefit ekzekutiv të kësaj kompanie tashmë do ta marrë Chris Kempczinski, i cili deri tash ka shërbyer si shef i McDonald’s-it për Shtetet e Bashkuara, shkruan “BBC”.
