Ai që e formoi i vetëm Lëvizjen Vetëvendosje, e rriti dhe e bëri partinë më të madhe në vend, mori një goditje pas shpine nga disa persona në fundin e vitit 2017, të cilët u larguan nga Vetëvendosja për të kaluar në PSD, sepse nuk pajtoheshin me Albin Kurtin, me njeriun që i mori afër vetës dhe i pjeku politikisht.
Shkruan: Drilon Rrahmani
Mendja e Dardan Molliqajt, Shpend Ahmetit, Visar Ymerit, Dardan Sejdiut e të tjerëve që u larguan, është e aftë politikisht deri në atë pikë ku kanë marrë mësim (pozitiv) nga Albin Kurti, por jo edhe më tutje.
Dallimi mes Albin Kurtit dhe atyre që nuk u pajtuan me të, është që Albini ka aftësi që çdo ditë të arrijë më shumë politikisht me ide të reja, kreativitet të shtuar, ashtu siç ka bërë.
Grupi i të larguarve nuk mund të arrij më shumë, pasi aty brenda nuk e kanë Albin Kurtit që t’i mësojë, e as nuk munden që nga jashtë ta kopjojnë. Në përfundim, ata e kanë kuptuar se ishte gabim largimi nga Vetëvendosja, mirëpo inati i madh për ta pranuar, po e bën PSD-në shumë kritike.
Po t’i shikojmë postimet e tyre në Facebook, shohim se më shumë janë fushatë kundër Albin Kurtit dhe Vetëvendosjes, sesa që ata e promovojnë koalicionin e tyre, AAK-PSD. Madje, postimet e tyre i sponsorizojnë që të marrin më shumë shikime.
Nëse do ta pyesësh dikë nga PSD-ja se çfarë ofrojnë ata nëse hyjnë në qeveri, ata nuk do të përgjigjen në atë pyetje. Ata do të përgjigjen krejtësisht ndryshe, për Albin Kurtin dhe Vetëvendosjen, duke i sulmuar këtë të fundit.
Kjo është strategji e gabuar e PSD-së, që po mundohet t’i thithë për vete votuesit e Vetëvendosjes, duke e sulmuar këtë të fundit.
Mirëpo Vetëvendosja ka arritur aq shpejt të konsolidohet si parti pas dorëheqjeve që i pati në fundin e vitit 2017 dhe fillimin e 2018-tës. Sidomos në 2-3 muajt e fundit, Vetëvendosje e kompletoi partinë dhe e zëvendësoi plotësisht nga vakumi që kishin lënë Shpendi&CO.
Haki Abazi, Shpejtim Bulliqi, Sabri Kiçmari, Hekuran Murati, Taulant Kryeziu, Agim Bahtiri, Daut Dauti, e shumë të tjerë, jo vetëm që disa kanë përvojë të madhe politike, mirëpo janë shumë të aftë në fushat e tyre.
Derisa Vetëvendosja kishte Dardan Sejdiun, si njëri ndër njohësit më të mirë në ekonomisë në Kosovë, tani ata kanë Hekuran Muratin, ndërsa përvojat politike të të dorëhequrve e që tash janë në PSD, i zëvendëson Shpejtim Bulliqi, Sabri Kiçmari, Agim Bahtiri dhe Haki Abazi.
Këta emra janë goditje për PSD-në, pasi ata kanë pritur që Vetëvendosja të izolohet si parti, të mos i shkojë askush, duke menduar se ata e kanë mbajtur në këmbë Vetëvendosjen.
Ata gabuan. Vetëvendosjen e mban ai që e formoi atë, por i ka mbajtur dhe këta. Albini po hyn fuqishëm në zgjedhjet e 6 tetorit, teksa vetëm Vjosa Osmanin e ka kandidate serioze.
Ndërsa koalicioni AAK-PSD, do të dështojë për shkak se, PSD-ja do t’ia humb votat AAK-së me prezencën e saj, pasi AAK-ja e fitoi një pjesë të elektoratit të PDK-së, me çështjen e qëndrimit ndaj taksës dhe kufijve.
