Në Shqipëri ka liri e demokraci,
dy shqiptarë bëjnë tri parti
shumë prej tyre edhe i bie
që të kenë nga 4-5 karta antarësie
dhe ato po t’ua numrojmë,
Shqipëria del popull 7-8 milionë
Partitë:
vëndi ku njerëzit thirren, rrjeshtohen
bashkohen e organizohen,
në prona e si mjete
për t’i shërbyer interesave të kryetarit
dhe të një grupi rreth të parit,
vendi ku antarësia e simpatizanët
vetëmashtrohen e vetëgënjehen
për të gënjyer e mashtruar të tjerët.
Partitë: këto streha
të spiunimit, intrigës e servilizmit,
streha të sundimit të interesit dhe injorancës,
aty ku humbet, shkrihet e perjashtohet ,
e ku humbasin rrënjët, liria,
dinjiteti e personaliteti,
dhe ku mendimi intelektual
shuhet e nuk dëgjohet,
aty ku spekulohet me patriotizmin ,
me humanitetin e sinqeritetin,
Partitë shqiptare
për të marrë e sunduar me pushtetin
e falimentojnë shoqërinë e demokracinë,
dhe e shkrijnë edhe shtetin
Partitë:
Ashtu si një në monizëm ,
ashtu edhe me shumicë
në demokraci,
për moral kanë
edhe korrupsionin e pabesinë,
aktrojnë në publik për pushtetin,
dhe përbetojnë
me premtime për demokracinë,
për ligjin e drejtësinë,
për mirëqënien e për shtetin ,
por bëjnë hatanë me pushtetin,
me paranë e hajninë,
me paturpësinë e tradhtinë
Partitë:
garojnë, flasin e premtojnë rrejshëm ,
dhe ndërvete akuzojnë, shajnë e bërtasin,
me hipokrizi mashtrojnë,
me djallëzi tradhtojnë,
me paturpësi bëjnë pazare e hajni,
dhe miliona pasuri
Partitë :
këto fantazma
kudo sundojnë,
në parlament e në qeveri,
në administratë e drejtësi ,
në polici e ushtri;
në financa dhe ekonomi
janë aty ku buron pasuria,
paraja, korrupsioni, interesi e pushteti.
Partitë:
manipulojnë me demokracisë,
me korrupsionin e hajninë
janë karta mbrojtje dhe imuniteti,
janë pushtet i mbi ligjit
dhe forcë e antishtetit
Demokracia, administrata ,
politika, pushteti , shteti e drejtësia ,
të kapura e zënë nga hajnat e zullumqarët
nga deputetët, ministrat e pushtetarët,
drejtorët, gjyqtarët e prokurorët
nga injorantët, servilët, dhe puthadorët e oborrit
të grupeve dhe bandave politike të parive
të organizatave të partive ,
që dëmtojnë me korrupsionin,
me vjedhjet, me marrëzitë,
me skandalet e me tradhtitë
Këta janë politikanë elitarët
dhe problemi më i madh,
që kanë sot shqiptarët
Pas vetërënies së komunizmit në Shqipëri, u vendos një sistem pseudodemokratik ku ajo që është parë dhe është për t’u theksuar është fakti i derivimit dhe i formimit të mbi 100 partive politike shqiptare dhe të shumë shoqatave të ashtuquajtura të pavarura por realisht janë satelite të politikës.Ajo cfarë i vë në një emërues të përbashkët pothuajse te gjitha partitë politike shqiptare është se ato kanë një vizion miop e të shtrembër politik e demokratik, kanë si liri të brëndshme sundimin e ligjit autokratik ku dominon vullneti dhe imponimi i kryetarit dhe i grupit të sejmenëve e servilëve rreth tij. Në partitë politike shqiptare vdes mendimi i lirë dhe ai intelektual, shuhet dhe hesht aftësia, dinjiteti e personaliteti dhe dominojnë servilizmi, ryshfeti, korrupsioni, nepotizmi, interersi dhe injoranca. Partitë politike shihen si streha dhe si trampolina për të siguruar dhe arrirë karrierë jo vetëm politike e pushteti por edhe shkencore, akademike, juridike, intelektuale, diplomatike dhe gjithëfare, pasi pa mbështetje dhe përkrahje politike: talenti, dhuntia, aftësia ,profesionalizmi dhe patriotizmi nuk do të munden kurrë që të marrin dhe të arrijnë vëndin që u takon në shoqëri dhe shtet. Dhe duke qenë se politika e partitë politike janë armike të virtyteve dhe vlerave, armike të aftësisë e patriotizmit, personalitetit e dinjitetit, dhe prandaj edhe shtetin, shoqërinë dhe jetën intelektuale, akademike, shkencore, diplomatike, juridike, ekonomike, morale etj., e drejtojnë halabakëria, injoranca, korrupsioni, nepotizmi dhe antivlerat. Kjo elitë politike ka 30 vite që e dominon politikën dhe tranzicion në Shqipëri, e cila e ka kapur dhe e mban peng shtetin, tërë sistemin, drejtësinë,zhvillimin dhe integrimin e Shqipërisë. Po kjo lloj elite politike ka 20 vite që e dominon edhe Kosovën.