LDK, koha për veprim!

Opinione

LDK, koha për veprim!

Nga: Melihate Tërmkolli Më: 19 gusht 2018 Në ora: 19:55
Melihate Tërmkolli

LDK nuk ka kryetar!. Nominalisht po, realisht jo. Kushdo që pretendon të kundërtën, bën veç hipokritin dhe tregon qyqarllëk. LDK, po udhëhiqet “me shtatë krena”, që do të thotë me asnjë, me askënd. Nëse është ndryshe, le të argumentojë kush të dojë.

Është komoditet tepër i madh për LDK-në, për Kosovën, që në këto rrethana politike, ndoshta më të rëndat pas vitit 1999, LDK të gjendet pa kryetar, pa strategji vepruese, pa orientim të qartë për vendin! As qeveria, as politikat skajshmërisht të dëmshme të Presidentit aktual a kujtdo qoftë, nuk “rrëzohen” me LDK-në, në gjendjen në të cilën është, me deklarata “ad hock” e të vakëta të ndonjë zyrtari të saj.

Përgjegjësia politike historike, nuk bie vetëm mbi ata që veprojnë dëmshëm. Përgjegjësia, në veçanti bie mbi ata që supozohet se mund të bëjnë mirë, siç mund të bëjë LDK-ja, e që nuk veprojnë. Një përgjegjësi të tillë, udhëheqja aktuale “kolektive” e LDK-së, nuk ka të drejtë t’ia faturojë LDK-së.  Është faturë e rëndë për një parti nacionale, demokratike e orientimit perëndimor, themeluese e shtetit të pavarur, vazhduese e filozofisë politike kombëtare të Presidentit Rugova.

Urtia është vlerë, dije, guxim, atdhetari, veprim e  jo dobësi, ligështim, shtrirje e qafës para të keqes.

LDK, është koha të ngjallet, ta ruajë e ta mbrojë shtetin, vlerat nacionale demokratike, me të gjithë përkrahësit, brenda e jashtë dhe me të gjithë miqtë e Kosovës!

commentFirst article
Sot mund të lexoni Shfletoni kopertinat