Kryeministri i Kosovës, Ramush Haradinaj sot edhe njëherë tregoi se nuk është një kryeministër i duhur për vendin, pasi në deklaratat e tij rreth dialogut me Serbinë për territoret e Kosovës, tha se do të ngritët nga çdo tavolinë që përmendet kjo temë.
Kjo nuk është e mjaftueshme për Haradinajn, pasi ai si kryeministër i Kosovës ka kompetenca ekzekutive që të ndërhyjë më shumë se kush do tjetër që ta ndal presidentin Thaçi nga kjo lojë e rrezikshme për vendin tonë.
Ngritja jote nga tavolina kur përmendet tema e territoreve, nuk i pengon aspak presidentit Thaçi, madje, atij i bëhet qejfi nga kjo punë, sepse mund të flas lirshëm me “miqtë” e tij serb.
Haradinaj nuk mund ta ndihmojë vendin nëse ngrihet nga tavolina, përkundrazi është e domosdoshme qëndrimi i tij aty, për ta përcjellur zërin e qytetarit kundër prekjes së territoreve.
Këto deklarata të Haradinajt nuk janë gjë tjetër përpos një ikje nga përgjegjësia si i pari i qeverisë së Kosovës, duke tentuar ta ruaj nderin e tij, kinse nuk ka gisht në marrëveshjet me Serbinë, sidomos në marrëveshjet ku cenohet integriteti i vendit tonë.
Por, nderi i tij është fundosur në mars të këtij viti, kur nënshkroi humbjen e 8000 hektarëve tokë të Kosovës, duke ia dhënë Serbisë, pas gjithë asaj zhurme që bëri sa ishte në opozitë.
Mos të mashtrohet opinioni i Kosovës nga “përplasja” Thaçi – Haradinaj, pasi ato deklarata të tyre kundërthënëse janë vetëm sa për sy të publikut që Haradinaj të mos jetë i përfshirë në këtë lojë. Por, ai po harron se është kryeministër i këtij vendi dhe çfarëdo marrëveshje me Serbinë që është në dëm të Kosovës, do të jetë e mbuluar edhe me hijen e Haradinajt.
Ne e dimë që nuk mund ta ndalësh Thaçin nga kjo marrëveshje. Nuk ke fuqi për atë. Mirëpo bashkohu me qytetarin e Kosovës në këtë betejë për ta ndalur atë, të paktën sa nuk të ka rrëzuar ai ty nga qeveria. Gjithsesi, shumë shpejt Haradinaj do të jetë i shkarkuar nga populli, së bashku me presidentin Thaçi.