Në Spitalin e Përgjithshëm të Pejës po vazhdon pranimi i pacientëve me simptoma të helmimit nga Komuna e Deçanit.
Drejtori i këtij spitali, doktor Skender Dreshaj në një prononcim ka treguar se sot në orët e mëngjesit janë pranuar tre pacientë.
“Sot në orët e mëngjesit janë pranuar tre pacientë të cilët janë duke marrë trajtim mjekësor, pra janë me infuzion”, ka thënë Dreshaj.
Dreshaj ka treguar se gjatë ditës së djeshme në emergjencë janë pranuar 6 pacientë mbi moshën 18 vjeç, në pediatri kanë qenë 8 fëmijë.
Nga të gjithë këta pacientë sipas Dreshajt, dy janë ndalur për trajtim të mëtutjeshëm shëndetësor. Dreshaj ka theksuar se gjendja e pacientëve me simptoma helmimi, kryesisht është e lehtë.
Ndryshe, situata në komunën e Deçanit vazhdon të jetë e rëndë.
Numër i madh i qytetarëve po vazhdojnë të kërkojnë ndihmë mjekësore në Qendrën e Mjekësisë Familjare “Adem Ukëhaxhaj” në këtë komunë.
Kujtojmë se që nga dita e diele e deri më sot, numri i qytetarëve me simptoma të helmimit që janë paraqitur në QKMF në Deçan, ka kaluar mbi 2 mijë. Komuna e Deçanit ka shpallur gjendje emergjente.
