Edhe 20 vite pas përfundimit të luftës Kosova ende nuk ka bërë ndonjë hap konkret që të padis Serbinë për gjenocid.
Lidhur me këtë, njohësi i çështjeve politike, Skënder Zogaj konsideron se krimet e Serbisë në Kosovë kanë qenë barbare dhe, nuk ka qenie sado pak njerëzore që do të mund të mos ndjehej i prekur në ndërgjegjen e tij.
“Serbët këtë e dinë por nuk u ka konvenuar që ta thonë, duke shpresuar se mund të anashkalohet tragjedia që na e kanë shkaktuar! Por, e kanë pa se kjo nuk mund të ndodhë, prandaj, disa, si aktori e regjisori serb Çedomir Petroviç, po e pranojnë zëshëm gjenocidin serb të kryer në Kosovë. Kjo është gjë e mirë që duhet të shërbejë për vazhdimin e kërkesave të ligjshme që Kosova duhet t’i realizoje, sepse gjenocidi i bërë nuk guxon të kalojë pa ndëshkimet e duhura”, thekson Zogaj për gazetën “Bota sot”.
Ai shprehet se, tashmë janë krijuar kushtet maksimale që Qeveria e Kosovës të padisë Serbinë për tërë gjenocidin që e ka kryer në Kosovë.
“Tash kur edhe nga serbet, si Çedomir Petroviç, Natasha Kandiq e ndonjë tjetër e pranojnë duke theksuar fakte, besoj se, janë krijuar kushtet maksimale që Qeveria e Kosovës duhet të padisë Serbinë për tërë gjenocidin që ka kryer në Kosovë. Kjo është e domosdoshme dhe e “shëndetshme” edhe për vetë Serbinë që të pastrohet nga “gjaku i papastër” që e ka mbërthyer qenien kombëtare serbe!”, thotë Skënder Zogaj.
