Politikani Zudi Xhelili, ka pohuar se migrimi nga Kosova është me karakter ekonomik, pasi shumica e të rinjve e braktisin vendin nga pamundësia për të siguruar një vend pune në vendin e tyre.
Ai ka thënë se si rezultat i politikave të tensionuara në Kosovë, shtetasit e Kosovës kanë përjetuar kriza të vazhdueshme institucionale që kanë ndikuar në pengimin e zhvillimit ekonomik.
“Kosova është ndër shtetet më të rralla në botë pasi ka afër 50% të popullatës nën moshën 25 vjeçare. Qeveria e Kosovës dhe bizneset private nuk kanë ofruar projekte zhvillimore për të shfrytëzuar këtë potencial njerëzor. Prandaj ata perspektivën e tyre e shikojnë në shtete me demokraci dhe ekonomi të zhvilluar”, ka thënë Xhelili.
Ai ka thënë se Qeveria e Kosovës mjaft ka mbijetuar në emër të politikës, andaj është koha që të zgjohet nga gjumi.
“ Është koha të merren me çështje strategjike zhvillimore, për hapjen e vendeve të punës, për përmirësimin e standardit jetësor se për ndryshe ikjet masovike do të vazhdojnë edhe në të ardhmen”, ka thënë Xhelili.
