Për shkak të mungesës së numrave në Kuvendin e Kosovës, është normale që partitë opozitare si Vetëvendosje, po ashtu edhe LDK-ja si partia më e madhe opozitare, t’i zgjedhin protestat si një nga format për ndaljen e presidentit Thaçi nga ideja e tij për korrigjim të kufijve. Kështu ka konsideruar analisti politik, Nexhat Haziri.
Ai në një prononcim për gazetën “Bota sot”, shprehet se ky opsion duhet të jetë i mirë koordinuar edhe me shoqërinë civile dhe shtresat tjera.
“Është normale që partitë opozitare si Vetëvendosje, po ashtu edhe LDK-ja si partia më e madhe opozitare, në mungesë të numrave në Kuvendin e Kosovës, për ta ndal presidentin Thaçi dhe planet e tij të dëmshme për Kosovën, duhet parë edhe opsionin e protestave. Ky opsion nëse do të jetë i koordinuar mirë edhe me shoqërinë civile dhe shtresat e ndryshme të qytetarëve, mendoj se ka mbetur e vetmja rrugë për ta ndalur Hashim Thaçin në zhbërjen e shtetit të Kosovës”, ka thënë Haziri.
Tutje, Haziri thekson se edhe deklarata e Brukselit lidhur me statusin e Trepçës, ishte konformë të këtij plani dhe idesë së presidentit Thaçi për të ashtuquajturin korrigjim kufijsh me Serbinë.
“Ne edhe sot jemi dëshmitar që ai edhe nga SHBA-ja ku qëndroi si i ftuar në ''Lutjet e mëngjesit'' serish iu kthye planit famëkeq për ndarjen e territorit të Kosovës gjoja si një marrëveshje historike me Serbinë dhe po ashtu ai këtë vizitë e shfrytëzoi edhe për të lobuar përmes kanaleve të ndryshme lobimi që po ashtu paguhen nga taksapaguesit kosovar, për të marrë mbështetjen e administratës amerikane për planin Rama-Vuçiq-Thaçi për arritjen e një marrëveshjes ne mes Kosovës dhe Serbisë në baza të ndarjes në vija etnike të territorit të Kosovës, po ashtu sot edhe deklarata e Brukselit lidhur me statusin e Trepçës, ishte konformë të këtij plani dhe idesë së presidentit Thaçi për të ashtuquajturin korrigjim kufijsh me Serbinë”, ka përfunduar Nexhat Haziri për gazetën “Bota sot”.