Kryeministri i Kosovës, Ramush Haradinaj vazhdimisht deklarohet se liberalizimi i vizave do të bëhet së shpejti.
Një gjë e tillë ende nuk ka ndodhur, edhe pse deklaratat nga politikanët po vazhdojnë prej vitesh.
Lidhur me mundësinë për liberalizim dhe fajtorin për këtë, deputetja nga radhët e LDK-së, Hykmete Bajrami, ka thënë për gazetën “Bota sot” se po të votohej Demarkacioni me Malin e Zi kur Haradinaj hidhte gaz lotsjellës në Kuvend, Kosova do ta kishte liberalizimin e vizave.
“Unë di një gjë; në kohën kur Haradinaj hidhte gaz lotsjellës në Kuvend, në emër të Kullës e Çakorrit sikur të ishte votuar demarkacioni me Malin e Zi, Kosova do ta kishte liberalizimin e vizave”, është shprehur ajo.
Sipas Bajramit, Haradinaj pasi erdhi në pushtet e harroi edhe Kullën edhe Çakorrin dhe e votoi demarkacionin dhe tashmë fajtori dihet.
“Ramushi erdhi në pushtet, e harroi edhe Kullën edhe Çakorrin, e votoi demarkacionin por situata në BE dhe në vendet anëtare të BE-së ndryshoi, kështu që fajtorin e dinë krejt. Tash me ketë Qeveri jo vetëm BE-ja është skeptike por skepticizmi ka kapluar secilin qytetar të vendit”, ka deklaruar Bajrami për “Bota sot”.