Rizgjedhja e Isa Mustafës në krye të LDK-së, i zbeh gjasat që ta kemi një koalicion në mes të LDK-së dhe VV-së.
Pas mbledhjes së kryesisë, krerët e partive politike kanë njoftuar se më 22 gusht do të shpërbëhet Kuvendi i Kosovës, që çon në zgjedhje të reja. Por, ende nuk dihet se çka do të pritet prej këtyre zgjedhjeve dhe sa janë gjasat që PDK të largohet nga pozita bashkë me AAK-në dhe Nismën, me të cilët ishin në qeverisje deri më sot.
Lëvizja Vetëvendosje i ka bërë ftesë të hapur LDK-së për koalicion parazgjedhor,ndërkohë që kjo e fundit po është shprehur kundër një koalicioni të tillë.
Deputetja e Kuvendit të Kosovës nga radhët e LDK-së, Valentina Bunjaku Rexhepi, ka thënë se shpërbërja e Kuvendit do të duhej të bëhej shumë shpejt, por PDK me Veselin e Thaçin, kanë dashur të "blejnë" kohë për të bërë ndonjë Qeveri teknike, copa-copë.
“Zgjedhjet siç po shihet, më së shumti po i kërkon LDK dhe fare nuk po i do, vetëm PDK. LDK që ditën kur e mori pushtetin PAN, u rrit tej mase. Qytetarët e panë se ne ishim "viktima" të virtytit akademik të udhëheqësisë së LDK-së! Asnjë parti nuk e do koalicionin me PDK-në dhe me të gjitha parashikimet, ajo veçse ka rënë, madje as për opozitë.
Zogiani: Fitorja arrihet më lehtë me një koalicion VV-LDK
Kurse, Avni Zogiani nga Lëvizja Vetëvendosje, ka thënë se ideja e tyre, është që nuk mjafton thjesht të fitohen zgjedhjet, pasi zgjedhjet duhet të fitohen bindshëm, kjo për shkak se aq keq është zhytur Kosova në krim e korrupsion, saqë kërkohet një legjitimitet i shkallës së lartë për ta transformuar.
“Kjo fitore arrihet më lehtë me një koalicion VV-LDK. Pra, nuk jemi duke folur thjesht për ta larguar PDK-në, por edhe për ta luftuar krimin e korrupsionin. Me fjalë tjera po flasim për transformimin e politikës. E për të ndodhur kjo kërkohet një legjitimitet i pakontestueshëm që pa asnjë problem arrihet me koalicionin VV-LDK-në”, ka thënë Avni Zogiani.
Mushkolaj: Çdo koalicion i mundshëm i ndonjë partie me PDK-në, garanton vazhdimin e kapjes së shtetit dhe keqqeverisjes
Analisti politik Imer Mushkolaj, ka pohuar se zgjedhjet duhet të prodhojnë rezultat për ta çuar PDK-në në opozitë.
Sipas tij, kjo bëhet e mundur po që se të gjitha partitë politike, e sidomos LDK vendosin vija të kuqe ndaj këtij subjekti.
“PDK është në pushtet tash 12 vjet dhe qëndrimi në opozitë do t’i bënte mirë edhe partisë, e më së shumti vendit. Çdo koalicion i mundshëm i ndonjë partie me PDK-në, garanton vazhdimin e kapjes së shtetit dhe keqqeverisjes”, ka thënë analisti politik Imer Mushkolaj.
Krasniqi: Një koalicion mes LDK-së dhe VV-së, do të ishte një koalicion i shpresës
Politologu Faik Krasniqi ka thënë se një koalicion mes LDK-së dhe VV-së, do të ishte një koalicion i shpresës, apo një koalicion që “Klanin Pronto” do ta dërgonte në opozitë.
“Por rizgjedhja e Isa Mustafës në krye të LDK-së, i zbeh gjasat që ta kemi një koalicion në mes të LDK-së dhe VV-së, marrë parasysh që garda e vjetër e LDK-së e duan një koalicion me PDK-në, në mënyrë që të vazhdojnë avazin e vjetër të keqpërdorimit të parasë publike. Sidoqoftë, mbetet të shihet se Isa Mustafa dhe kryesia e LDK-së, a e kanë seriozisht dërgimin e PDK-së në opozitë, apo edhe kësaj radhe do e mashtrojnë elektoratin e saj”, ka thënë politologu Faik Krasniqi.
Mehmeti: Kosova duhet me u qeverisë nga njerëz që nuk i kanë duart e përlyera me krim
Ndërsa, Faton Mehmeti ka thënë se me Isën në krye të LDK-së nuk ka shumë shpresë së LDK do kthehet në pushtet, përveç se nëse përdor karremin e saj që quhet Vjosa Osmani.
Sipas tij, Vjosa shihet si shpëtimi i LDK-së, ndryshe kjo parti do të pësoj keq në zgjedhje.
“Kjo do i shërbente PDK-së për të vazhduar të mbetet në pushtet, nëse LDK nuk i vendos vija të kuqe kësaj partie. Gjithashtu edhe një koalicion me Vetëvendosjen do të ishte i mirëpritur nga qytetarët, vetëm për të larguar Klanin " Pronto", nga pushteti, që faktikisht ka kapur shtetin dhe ka rrënuar shpresën e qytetarëve të Kosovës. Kosova duhet me u qeverisë nga njerëz që nuk i kanë duart e përlyer me krim, që i bie që me çdo kusht mos me lidh koalicion me PDK dhe me Nismën, që është produkt i PDK-së. Nisma janë hajna njësoj si PDK, andaj me këto dy parti nuk duhet me lidh koalicion në asnjë mënyrë”, ka thënë analisti politik Faton Mehmeti.