Presidenti amerikan, Donald Trump, ka shkarkuar John Boltonin nga pozita e këshilltarit për siguri, duke thënë se s’është pajtuar me shumë prej sugjerimeve të tij.
“E kam njoftuar John Boltonin mbrëmë se shërbimet e tij më s’janë të nevojshme në Shtëpinë e Bardhë. S’jam pajtuar me shumë prej sugjerimeve të tij”, ka shkruar Trump në Twitter duke shtuar se një këshilltar për sigurinë kombëtare do të caktohet javën e ardhshme.
Analisti dhe njohësi i zhvillimeve politike në vend, Blerim Burjani, duke e komentuar shkarkimin e John Boltonit, qw ishte nw pozitën këshilltar për siguri, ka thënë se kjo është një çështje e SHBA-së dhe qeverisë amerikane e cila nuk ka rëndësi për Kosovën.
“Ajo është çështje e SHBA-së dhe qeverisë amerikane. Kosova bashkëpunon dhe me zyrtar të SHBA-ve. Kosova është mike e madhe e Shteteve të Bashkuara të Amerikës dhe anasjelltas. Ne jemi dy shtete mike dhe kemi lidhje të fuqishme historike, pra gjithmonë do të jetë e gatshme të bashkëpunojë me secilin zyrtar që vjen nga SHBA-të”, është shprehur Burjani.
Tutje, Burjani ka theksuar se politika amerikane për Kosovën nuk varet zyrtarët sikurse Bolton, pasi sipas tij, vazhdon të jetë miqësia e përjetshme Kosovë –SHBA.
“Politika amerikane nuk varet nga ata, zyrtarët ndërrohen, por mbetet SHBA dhe miqësia e përjetshme Kosovë-SHBA”, ka përfunduar Burjani.
Kujtojmë se kur ishte emëruar në këtë pozitë, Bolton ishte raportuar si kundërshtar i pavarësisë së Kosovës dhe si njëri ndër bashkëpunëtorët më të afërt të Presidentit Trump në Shtëpinë e Bardhë.
