Kryetari i PDK-së, Kadri Veseli, i cili është kandidat për kryeministër ka planin për luftimin e krimit dhe korrupsionit.
Ndër të tjera, ky plan parasheh që tash e tutje zyrtarët, të cilët me dashje apo pa dashje e dëmtojnë buxhetin e Kosovës, një pjesë të këtij dëmi ta paguajnë ata vet.
Lidhur me këtë, politologu Ramush Tahiri, ka thënë për gazetën “Bota sot” se lufta antikorrupsion bëhet me ligj përmes Kuvendit dhe e quan demagogji fushatën që nuk bazohet në ligje.
“Lufta antikorrupsion bëhet me ligj. Kuvendi është dashur të nxjerr ligjet e nevojshme për parandalimin, pengimin, dënimin, e korrupsionit dhe për sanimin e pasojave të shkaktuara nga korrupsioni. Fushata që nuk bazohet në ligje dhe në politikat ligjore duket si demagogji”, është shprehur ai.
Tahiri thotë se ligji parashikon që pasuria e fituar në mënyrë të korruptuar të merret, por shteti duhet të krijojë kushte që të ketë drejtësi e gjyqësi të pavarur.
“Ligji edhe ashtu parashikon që pasuria e fituar në mënyrë korruptive të merret dhe palët e dëmtuara të dëmshpërblehen. Pra politikat duhet të zbatohen dhe shteti të krijon kushtet në drejtësi e gjyqësi e prokurori të paanshme e të pavarur”, ka deklaruar Ramush Tahiri për “Bota sot”.