Shefja e BE-së në Kosovë, Nataliya Apostolova, ka thënë se dy kushtet për liberalizim të vizave janë luftimi i krimit dhe korrupsionit.
Këto dy kushte janë prej kohësh ndaj Kosovës nga BE.
Por, sa ka shpresë që udhëheqja e re e Kosovës t’i përmbushë këto dy kushte?
Selim Daku, drejtor i Qendrës kosovare për diplomaci, ka thënë për gazetën “Bota sot” se ky proces nuk varet nga institucionet e Kosovës, por është në dorë të vendeve anëtare të BE-së.
“Liberalizimi i vizave për qytetarët e Kosovës tashmë është shndërruar në një telenovelë që nuk po i dihet fundi. Sipas mendimit tim, ky proces nuk varet nga institucionet kosovare. Ai është në dorë të vendeve anëtare të Bashkimit Evropian, të cilat në rastin e Kosovës kanë ngecur në procedura dhe kanë tejkaluar të gjitha parashikimet e pritshmëritë”, ka thënë Daku.
Ai vlerëson se kushtet që janë vendosur, luftimi i krimit dhe korrupsionit, nuk janë kritere që pengojnë liberalizimin e vizave për Kosovën.
“Sa i përket kushteve për luftimin e krimit të organizuar dhe korrupsionit, konsideroj se ato nuk janë procese që vazhdojnë dhe nuk janë kritere që pengojnë liberalizimin e vizave për Kosovën. Këtë e ka theksuar edhe Komisioni Evropian në raportin për zbatimin e standardeve për liberalizimin e vizave për Kosovën”, ka vlerësuar Selim Daku për “Bota sot”.
Sipas Dakut, që nga viti 2016 qytetarët e Kosovës po mbahen padrejtësisht të izoluar dhe për këtë fajtor funksionimi kompleks i mekanizmave të Bashkimit Evropian.
“Qytetarët e Kosovës që nga viti 2016, padrejtësisht mbahen të izoluar. Për këtë fajtori i vetëm është funksionimi kompleks i mekanizmave të Bashkimit Evropian. Kosova që atëherë ka plotësuar kushtet për të fituar të drejtën e lëvizjes pa viza, veçanërisht në vitin 2018 kur janë plotësuar edhe kushtet shtesë si ratifikimi i demarkacionit me Malin e Zi dhe forcimi i arritjeve në luftën kundër krimit të organizuar dhe korrupsionit”, ka theksuar ai.
Në anën tjetër, politikanët vazhdimisht kanë dhënë deklarata për afate kohore në lidhje me liberalizimin e vizave për qytetarët e Kosovës.
E për këtë, Daku thotë se ato janë të panevojshme dhe ngjallin neveri, e nuk kanë peshë as karakter politik.
“Deklaratat se liberalizimi i vizave për Kosovën do të ndodhë së shpejti, janë tepër të panevojshme dhe ngjallin neveri. Ato më nuk kanë as peshë e as karakter politik. Deklaratat e tilla, kanë tejkaluar çdo pritshmëri qytetare saqë edhe nëse nesër ndodhë, ai nuk do të bëjë bujë të madhe tek opinionin publik”, ka përfunduar Selim Daku për “Bota sot”.
