Paralajmërohen arrestimet e para të Gjykatës Speciale

Politika

Paralajmërohen arrestimet e para të Gjykatës Speciale

Nehat Shaqiri Nga Nehat Shaqiri Më 18 tetor 2019 Në ora: 08:26
Selia e Gjykatës Speciale

Gjykata Speciale ka filluar furishëm aktivizimin e saj. Deri tash, ka dërguar ndoshta dhjetëra e ndoshta qindra ftesa për t’u paraqitur në Hagë. Disa si dëshmitarë e disa të tjerë si të dyshuar. Pas gjithë këtyre ftesave, nga java e ardhshme priten arrestimet e para. Kështu ka paralajmëruar nënkryetari i OVL-UÇK-së, Nasim Haradinaj.

E pas këtyre arrestimeve, vendi mund edhe të shkoj në trazira. Ky ishte një vlerësim i më hershëm i disa eksponentëve të UÇK-së, të cilët kanë konsideruar se arrestimet nga kjo Gjykatë mund të tensionojnë situatën në vend. Por një tensionim i tillë, normalisht që është i gabueshëm, për vet faktin se Gjykata Speciale u miratua me vetë dëshirë, madje me presion të madh për të votuar atë nga presidenti i Kosovës, Hashim Thaçi.

Halilaj: Brenda këtyre 5 viteve të ardhshme nuk do të ketë asnjë ndikim në skenën politike

Avokati Gazmend Halilaj, thotë për gazetën “Bota sot” se, Gjykata Speciale është sulmi më i madh që i bëhet Ushtrisë Çlirimtare të Kosovës, por edhe luftës për liri. 

“Natyrisht luftë krejtësisht të pastër nuk ka, situata në teren e imponon një gjë të tillë. Askush s’do të kërkoj që mos të zhvillohet proces gjyqësor për secilin krim të mundshëm, por janë gjykatat vendore, është Kodi penal, në harmoni të plotë me të drejtën penale ndërkombëtare, kemi gjykatës dhe prokuror, kemi mbi 10.000 polic, rreth 900 avokat të licencuar, dhe natyrisht që prej përfundimit të luftës, në vazhdimësi është trajtuar kjo çështje, madje janë dhënë Aktgjykime meritore dhe dënime mjaft të ashpra për personat të cilët gjykata ka konsideruar që në çfarëdo mënyre kanë rënë ndesh me rregullat e luftës”, thotë Halilaj.

Image
Gazmend Halilaj

Ai shton se, nuk kemi të drejt tani të ankohemi, pasi tek ne ekziston një sistem juridik, populli udhëhiqet përmes përfaqësuesve të tyre në këtë rast Kuvendit të Kosovës, ku me shumicë votash është aprovuar Ligji për themelimin dhe funksionimin e Gjykatës se posaçme e njohur si Gjykata Speciale.

“Ndërsa sa i përket impaktit që mund të ketë kjo gjykatë, gjegjësisht ndikimit ne gjendjen e sigurisë, konsideroj që është i nivelit të mesëm kah i ulët ngase çdo ditë e më tepër qytetarët po i largohen zgjidhjes së problemeve përmes rrugëve/protestave”, thekson ai.

Halilaj thotë që fillimi i punës së kësaj Gjykate, nuk do të ketë ndikim në skenën politike, të paktën në pesë vitet e ardhshme.

“Sipas mendimit tim profesional gjithmonë duke u mbështetur në dispozitat ligjore nuk shoh ndikim të paktën Brenda afatit kohor 5 vjeçar. Sepse e drejta në gjykim të drejtë, parimi i barabarësisë së armëve, drejta në respektimin e afateve kohore, e drejta në parimin dyllojshmërisë, pastaj prezantimi i pafajësisë deri në nxjerrjen e një aktgjykimi të formës së prerë natyrisht që marrin kohë, andaj konsideroj që të paktën brenda këtyre 5 viteve të ardhshme nuk do të ketë asnjë ndikim në skenën politike”.

Nasim Haradinaj: Specialja u krijua nga ideja ruse me të dhënat serbe

Nënkryetari i OVL-së së UÇK-së, Nasim Haradianj për krijimin e Gjykatës Speciale dhe ftesat që po i dërgon thotë se kjo që po ndodh është ajo e cila u gatua.

E sipas tij, kjo u gatua nga ideja ruse me të dhëna serbe dhe me budallallëk të parlamentarëve tanë.

“Bukën e mbledhin qeveritarët tanë. Kjo u gatua nga ideja ruse me të dhënat serbe por me budallai të parlamentarëve tanë”, tha Haradinaj.

“Këtë çështjen e Gjykatës, së pari e ka ngritur një deputet Evropian, Dick Marty pas disa të dhënave dhe ne mos të harrojmë se, çdo dëshmi qoftë e pakonfirmuar mirë, qoftë fakte apo shpifje nxit për një kallëzim penal e që pastaj vërtetohet, pro e keqja është këtu se nuk e di se kush do të dënohet për shpifje, e mundësinë e dënimit për shpifje ia mundësoj apo ia ka hjek vet deputetët tanë në Kuvend”, tha Haradinaj në një emision televiziv transmeton gazeta “Bota sot”.

Haradinaj tha tutje se OVL-UÇK nuk është kundër zbulimit të krimeve nëse ka, por janë kundër këtij procesi.

“A pe shifshi se kemi ardhë në gjendjen e ish-Jugosllavisë dhe të Milloshit, do të thotë, çdo kush që ka qenë i Ushtrisë Çlirimtare të Kosovës është target. Çka është më e keqja që tash ka filluar edhe ndaj atyre që nuk kanë qenë hiq në UÇK”, tha Haradinaj duke dhënë disa shembuj se janë ftuar edhe civil të cilën lidhje nuk kanë me UÇK-në.

Ndërsa për Safete Hadërgjonaj thotë se për gjithçka ka mundur të ftohet nga Gjykata Speciale por kurrë jo për Ushtrinë pasi nuk ka qenë kurrë pjesë e Ushtrisë Çlirimtare të Kosovës.

Sa i përket ftesave të reja nga Specialja, Haradinaj thotë se kryesisht tash kanë me qenë në pjesën e Llapit.

Ai ka thënë se gjatë kësaj jave, apo javës që po vjen do të ndodhin arrestimet e para nga Gjykata Speciale.

“Një lajm që ne e kemi më të keq, sipas disa të dhënave në bazë të disa avokatëve, sepse ne kemi bashkëpunim me ta, priten arrestimet këtë javë ose javën tjetër, pra brenda këtij muaji gjithsesi”, tha Haradinaj i cili këtë e quan “kulmi i së keqes”.

Ai tutje tha se tash Gjykata Speciale e Hagës ka bë një ndryshim, pasi po i definon se a janë të dyshuar apo dëshmitarë.

Sipas Haradinajt në Kuvend nuk është dashur me votua një gjykatë një etnike që të hetohen vetëm shqiptarët.

“Këtu për t’u bërë një krim është dashur me qenë dy palët. Dhe tash me këtë cilësinë që na ka bërë Gjykata ne kemi dalë që jemi agresor. Dihet kush është agresori. Ne kemi qenë viktimë. Ne kemi hy në luftë pa dashje, në kuptimin e detyrueshëm, por me dashje për me u çlirua”, ka shtuar ai.

“Kohëve të fundit kur filluan me i thirrë njerëzit që nuk kanë qenë kompetent në UÇK, fillova thash mos e kanë me qëllim degradimin e kësaj Gjykate dhe mos po shkon atje ku unë mendoj, e dështuar. Sepse Gjykata do të del e dështume qoftë edhe me thirrjen dhe me arrestimin e njerëzve. Kjo është e dështuar se munden me u ftua edhe 200 apo 300 njerëz dhe mos me pas asgjë”, pohoi Haradinaj.

Haradinaj tha se duhet me ditë që ka pasur shpifje nga njerëzit që kanë kërkuar azil, pasi nuk e kanë ditur se këto do të ndikojnë.

Ai tutje ka dhënë disa shembuj se si u kriju kjo gjykatë.

“Për me kërkuar azil, paslufte kanë thënë se po më ndjek filan fisheku apo filan komandanti ka dashur me më vra sepse unë nuk kam dashur të përzihem me serbë e as me shqiptarët”.

“Nuk ka Gjykatë që bazohet në shpifje më shumë sesa kjo psh, për shitjen e organeve. Nuk ka shpifje ma të madhe, sepse ne nuk kemi pasur njerëz që kanë pasur mundësi me ndërru veshkë, me ndërru zemra për me i shitë. Spitale me renome që kanë qenë edhe sot nuk munden me i bë këto operacione”, ka thënë ai.

Haradinaj ka akuzuar edhe disa zyrtarë të Lidhjes Demokratike të Kosovës, për krijimin e disa raporteve që sipas tij, kanë rezultuar edhe në këtë Gjykatë.

Kurse sa i përket thirrjeve apo ftesave aq të mëdha nga Gjykata Speciale, Haradinaj thekson se nuk e kanë paramenduar që do të ftohet kaq shumë.

“Për mua, çdo ushtarë i Ushtrisë Çlirimtare të Kosovës, është target dhe mund të jetë target i kësaj Gjykate, apriori duke cekur se tash çdo qytetarë i Kosovës, edhe pse nuk ka marrë pjesë në luftë, qysh kaun fillu këta me thirrë, duket se do të thirren. Kjo gjykatë, ka fillu ti ngjasojë gjykatave serbe të kohës së Titos dhe kohës së Milloshit, ku vetëm se ke qenë shqiptarë, me mujt me qenë i dyshuar dhe fajtorë”, pohoi Haradinaj, i cili tha se nuk ka tjetër shpjegim për këtë.

Haradinaj ka përsëritur se nuk po dëshiron me mbrojtë dikë, por nëse kanë bazë për krime le të urnojnë, por nuk beson se Ushtria Çlirimtare ka bërë krime pasi nuk kanë mundur, nuk kanë pas mundësi.

Haradinaj thotë tutje se, në Gjykatën Speciale bota thotë se po dënohet shqiptari, duke aluduar se Specialja është krijuar vetëm për shqiptarë dhe kundër UÇK-së.

commentFirst article
Sot mund të lexoni Shfletoni kopertinat