Shumë pak zgjati entuziazmi për njohjen e Pavarësisë së Kosovës nga Xhamajka. Ishte Presidenti i Kosovës Hashim Thaçi, ai që fillimisht njoftoi për njohjen nga ky shtet, kurse meritat i pari i shtetit ia autribuoi ambasadores së Kosovës në Washington, Vlora Çitaku.
Mirëpo, gjithçka e përfundoi me një status nga ana e ministres së Jashtme të Xhamajkës në Twitter, e cila bëri të ditur se ky shtet ende nuk e ka njohur Pavarësinë e Kosovës.
Lidhur me këtë, analisti politik, Skënder Mulliqi, në një prononcim për gazetën “Bota sot”, ka thënë se skandali me Xhamajkën është dështim i diplomacisë së kaluar, në vargun e shumë dështimeve të deritashme.
Kurse sa i përket shkarkimeve nga ana e shefit të diplomacisë së Kosovës, Mulliqi konsideron se është duke u bërë një punë e mirë.
“Edhe kjo ‘njohje’ e shtetit të Kosovës rezultoi se ishte dështim i diplomacisë së kaluar, në vargun e shumë dështimeve të deritashme. Diplomacia jonë është mbushur me diplomatë të dobët, dhe mirë ka bërë Ministri i Jashtëm, Glauk Konjufca që i ka larguar shumë konsuj nga disa vende të botës. E kjo duhet të vazhdon, duke emëruar njerëz me kredibilitet. Edhe mosnjohja nga ana e Xhamajkës, që u prezantua nga presidenti Thaçi , e pastaj edhe nga Vlora Çitaku, është mospërgjegjësi më shumë e kësaj të fundit, që nuk ishte dashur të kalon pa llogaridhënie. Kështu merret vesh, e veprohet në secilin shtet demokratik”, ka deklaruar ai.
Sipas analisti politik, viteve të fundit puna e diplomacisë së Kosovës ka degraduar aq keq sa e pamundur të mendohet.
“Ngutja e tillë për të dalë para opinionit gjoja për ndonjë sukses të arritur , na ka dëmtuar shumë deri më sot. Nuk patëm njohje të reja, por patëm shumë çnjohje. Si nuk patëm as liberalizim vizash, as inkuadrim ne asnjë strukture relevante të BE-së. Qeveria e re, duhet te lirohet nga diplomatët e dobët, së punët mund të na shkojnë edhe me keq. Kosova nuk është shtet presidencial, prandaj të gjitha ingerencat politike i ka qeveria, e cila duhet t’i marrë frenat në dorë, për ta treguar seriozitetin e shtetit të Kosovës në planin e jashtëm dhe atë të brendshëm”, është shprehur analisti politik Skënder Mulliqi.
Krejt në fund, analisti politik ka theksuar se me njerëz të emëruar sa për sy e faqe dhe sa për të marrë paga të majme, shteti i Kosovës nuk ka nevojë.
Kujtojmë se ambasadorja Çitaku deri më tani nuk ka dhënë asnjë sqarim për media lidhur me këtë çështje.