Në Lidhjen Demokratike të Kosovës tashmë tensionet dhe mospajtimet mes Vjosa Osmanit dhe anëtarësisë së vjetër të kësaj partie vetëm sa kanë dalë më shumë në pah kohëve të fundit.
Kryetarja e Kuvendit të Kosovës nga radhët e Lidhjes Demokratike të Kosovës, Vjosa Osmani, qysh nga dita kur partia e saj ka kërkuar mocion mosbesimi për Qeverinë e udhëhequr nga Albin Kurti, ka dalë kundër subjektit së saj.
E lidhur me këtë, njohësi i çështjeve juridike e kushtetuese në vend, Blerim Burjani, ka thënë se veprimet e Osmanit kundër LDK-së, po e dëmtojnë këtë të fundit.
Ai mendon se kryetarja aktuale e Kuvendit të Kosovës, Vjosa Osmani, duhet të largohet nga Lidhja Demokratike e Kosovës (LDK).
“Nuk ka nevoje ta largojë, me këtë mënyrë te veprimit ajo veten e largon, ajo vet duhet të tërhiqet nga LDK. Veprimet e kundërta me interesat partiake është i dëmshëm, pra nuk ka parime të dyfishta”, ka thënë juristi Burjani, për gazetën “Bota sot”.
Tutje, Burjani thekson se Osmani duhet të krijojë një parti të re, pasi sipas tij, koha e saj në LDK ka përfunduar tashmë.
“Vjosa Osmani duhet të bëj parti të re. Kjo çështje e saj me Lidhjen Demokratike të Kosovës ka përfunduar”, ka përfunduar juristi dhe njohësi i çështjeve Kushtetuese në vend, Blerim Burjani, për gazetën “Bota sot”.
