Kryeministri i Kosovës, Avdullah Hoti ka deklaruar se nuk do ta mbështesë formimin e Asociacionit të Komunave Serbe bazuar në marrëveshjen e nënshkruar në Bruksel.
Dhe siç duket, kjo deklaratë e Hotit i pengoi shumë plitikanëve serbë në Kosovë të cilët reaguan menjëherë duke kërcënuar me largim nga Qeveria aktuale.
Më saktësisht, ishte Goran Rakiq, përfaqësuesi i Listës Serbe dhe aktualisht zëvendëskryeministër në Qeverinë e Kosovës i cili paralajmëroi largim nga koalicioni në raste se nuk përfillen kërkesat e tyre.
Duke marrë parasysh, se Qeveria Hoti u formua me ndihmën e votave të tyre, kjo edhe mund të shkaktoj destabilizim brenda kolicionit.
Lidhur me këtë, njohësi i çështjeve kushtetuese, Mazllum Baraliu në një bashkëbisedim më gazetën “Bota sot” deklaroi se Qeveria aktuale është Qeveri e minorancës. Ai shtoi se kjo qeveri varet e gjitha nga Lista Serbe.
“Kjo qeveri që nga fillimi ka qenë dhe ka mbetur ende qeveri e minorancës. Nga Lista Serbe varet gjithsesi, pasi ajo i ka rreth 10 deputetë”, deklaroi Baraliu.
Analisti tha se vazhdimi i dialogut Kosovë-Serbi nuk është interes madhor i shtetit tonë.
Baraliu paralajmëroi se në rast të tërheqjes së Listës Serbe, atëherë bie Qeveria dhe ndërprehet dialogu me Serbinë.
“Nëse tash për tash nuk është interes madhor vazhdimi i bisedimeve, që realisht nuk është, atëherë me sygjerimin e Beogradit, Lista Serbe edhe mund të tërhiqet nga koalicioni.
Kështu, qeveria mund të bie dhe dialogu ne Bruksel shtyhet deri pas zgjedhjeve të reja të jashtëzakonshme”, përfundoi Baraliu.