Shumë zhurmë u bë lidhur me Asociacionin e Komunave me Shumicë Serbe, për të cilën Serbia tha se do të diskutohet në dialogun në Bruksel.
Ndërsa, përfaqësuesi special i BE-së për dialogun, Miroslav Lajçak, ka thënë se Asociacioni duhet të formohet pasi Kosova është zotuar për këtë dhe nëse duhet, të ndryshohet edhe Kushtetuta e Kosovës.
E tani, zëdhënësi i BE-së për Politikë të Jashtme dhe Siguri, Peter Stano ka konfirmuar se të enjten do të takohen Kosova dhe Serbia në Bruksel në nivelin e ekspertëve, ku do të takohen Skender Hyseni dhe Marko Gjuriq.
Stano tha se në takimin e së enjtes nuk do të diskutohet për Asociacionin e komunave me shumicë serbe.
Lidhur me këtë, profesori dhe njohësi i çështjeve juridike, Muhamet Kelmendi, ka thënë për gazetën “Bota sot” se barazia në mes të dy shteteve nuk varet nga një takim, por nga temat që diskutohen , duke shtuar se Asociacioni nuk është temë e ngutshme.
“Barabarësia nuk varet nga një takim, por nga temat që paraqiten dhe trajtimi që i bëhet shtetit nga ana e këtij Unioni. Natyrisht se këtej e ka në dorë edhe vet Kosova. Përfaqësuesit e Republikës kërkohet të paraqesin temat që duhet domosdoshmërish të shqyrtohen. Nuk është temë e ngutshme Asociacioni. Minoriteti serb në Kosovë është në gjendje shumë të mirë dhe i mbrojtur. Ai gëzon të drejta dhe liri shumë me gjëra se vet shumica shqiptare. Kudo i kanë vendet e garantuara dhe motivohen me forca të KFOR-it”, është shprehur ai.
Sipas Kelmendit, temë e ngutshme është paqja dhe zgjidhja e problemeve ekzistuese, Kosova nuk njihet nga Serbia, duke shtuar se në dialog duhet të paraqiten temat domethënëse dhe jo shkatërrimtare serbe.
“Temë e ngutshme është paqja dhe zgjidhja e problemeve ekzistuese. Ne jemi në mijëra vetë ende të mbytur dhe të varrosur nëpër Serbi. Shteti i ynë nuk njihet nga Serbia. Dëmet shkojnë në 30 miliardë euro. Kemi shumë fonde të grabitura dhe një pakicë nacionale shqiptare në Kosovën Lindore pa të drejta. Këto janë temat e diskutimit. Ndërsa, ikja nga kërkesa serbomadhe për shtetin serb në Kosovë, vjen kryesisht nga RF e Gjermanisë dhe e SHBA-ve. Ato nuk janë të interesuara për këtë, por për njohje dhe hapjen e perspektivës për integrim në UE. Por, pavarësisht kësaj, në dialog duhet t’i paraqesim temat domethënëse. Ato shpien nga paqja. Jo temat shkatërrimtare serbe”, ka deklaruar Muhamet Kelmendi për “Bota sot”.