Riza Smaka tregon sa muaj mund të ushtrohet posti i Presidentit nga Vjosa Osmani

Politika

Riza Smaka tregon sa muaj mund të ushtrohet posti i Presidentit nga Vjosa Osmani

Nga: G.B Më: 9 nëntor 2020 Në ora: 17:48
Vjosa Osmani

Me konfirmimin e aktakuzës nga Gjykata Speciale ndaj ish presidentit Hashim Thaçi dhe dorëheqjen e tij nga ky post, në krye të vendit ka ardhur kryetarja e Kuvendit, Vjosa Osmani, si u.d e presidentit të Kosovës.

E në këtë post, lideri i LDK-së, Isa Mustafa, ka thënë se nuk e pranon ish bashkëpartiaken e tij, Vjosa Osmanin, duke shtuar se ky post i takon PDK-së dhe madje nuk e pranon as Ramush Haradinajn për president.

E ky i fundit e ka kërcënuar prej kohësh koalicionin qeverisës me prishje, nëse nuk ia japin postin e presidentit.

Lidhur me gjithë këtë, profesori Riza Smaka, ka thënë se kur presidenti nuk është i aftë për të ushtruar funksionin, ai vullnetarisht mund t’ia kalojë detyrat e postit të tij Kryetarit të Kuvendit të RK-së.

“Në rastin kur Presidenti i RK-së, nuk është i aftë përkohësisht për të ushtruar funksionin përkatësisht për t’i përmbushur përgjegjësitë e veta, ai vullnetarisht mund t’ia kalojë detyrat e postit të tij Kryetarit të Kuvendit të RK-së! Nëse kundër Presidentit aktual të RK-së do të ngritej aktakuzë penale e plotfuqishme, do të mund të ndodhte që ai të paraqiste dorëheqjen nga posti i Presidentit, që do të thotë se nuk do të ishte detyrimisht i obliguar për ta ofruar dorëheqjen e vet, përderisa çfarëdo aktakuze, juridikisht është hipotezë, që mund të konfirmohet me aktgjykim dënues përfundimtar por mund të ndodhë edhe e kundërta çfarë ishte rasti me z. Ramush Haradinajn. Deri në rastin më të keq të mundshëm të shpalljes përfundimtare fajtor dhe të caktimit të dënimit, kush do pra, A Fortiori, aq më parë Presidenti konform me parimin e inocencës, do të konsiderohej i pafajshëm”, është shprehur ai.

Image
Prof. Dr. Riza Smaka

Sipas Smakës, kalimi i kompetencave nga presidenti tek kryetari i Kuvendit bëhet me urdhër shkrimor.

“Zgjidhja e tillë kushtetuese shprehimisht i referohet gjendjes shëndetësore por, konform me Analogia Juris-in dhe Analogia Legis-in, do të mund të trajtohej edhe situata e ndalimit - arrestimit eventual të Presidentit për një periudhë të caktuar. Kalimi i kompetencave të Presidentit në atë të Kryetarit të Kuvendit bëhet me urdhër shkrimor i cili duhet të përmbajë periudhën dhe shkaqet e kalimit të përgjegjësive të tija. Urdhrin shkrimor Presidenti do të jepte fakultativisht nga se kalimin e përgjegjësive e bën vullnetarisht e jo imperativisht. Presidenti i RK-së do të rifillonte ushtrimin e funksionit të vetë pas skadimit të shkakut apo shkaqeve penguese për periudhën e caktuar. Nga momenti i tillë, Kryetarit të Kuvendit do t’i pushonte autorizimi i ushtrimit të funksionit të Presidentit”, ka theksuar ai.

Profesori shpjegon se çka ndodhë nëse nuk ndodhë kalimi vullnetar i përgjegjësive.

“Në rastin kur nuk ndodhë kalimi vullnetar i përgjegjësive, pas konsultimit me konsiliumin mjekësor, me shumicën e kualifikuar të votave të Kuvendit vendoset që Presidenti është përkohësisht i paaftë për t'i ushtruar funksionet e veta dhe Kryetari i Kuvendit të RK-së caktohet ushtrues detyre i Presidentit deri sa ai të jetë i aftë për ushtrimin e përgjegjësive të veta”, ka shtuar ai.

Smaka thotë se posti u.d i presidentit mund të ushtrohet në periudhë kohore më të gjatë se gjashtë muaj.

“Posti i ushtrimit të detyrës së Presidentit të RK-së nuk mund të ushtrohet për periudhë kohore më të gjatë se gjashtë muaj”, ka deklaruar Riza Smaka për “Bota sot”.

Shfaq komentet
comments powered by Disqus
Sot mund të lexoni Shfletoni kopertinat