Posti i presidentit mbetët njëra ndër çështjet më të diskutuara në vendin tonë. Kjo temë, po del të jetë shkaktar i mosmarrëveshjeve brenda koalicionit aktual në mes Lidhjes Demokratike të Kosovës dhe Aleancës për Ardhmërinë e Kosovës.
Në këtë mes, po përfshihet edhe Partia Demokratike e Kosovës, e cila po përflitet për një mundësi të hyrjes në koalicion me LDK-në.
Mirëpo emrat për këtë post ende nuk janë bërë publike nga të gjitha partitë.
Ndërsa gjatë ditës së sotme kreu i LDK-së, Isa Mustafa, ka thënë se javën që vjen do të takohen me partitë politike për të diskutuar për këtë temë.
Sa i përket kandidaturës së Ramush Haradinaj shton se nuk e di nëse kreu i AAK-së është tërhequr nga kandidatura për president të vendit. Sipas të parit të LDK-së duhet të arrihet një pajtueshmëri dhe jo të shkohet në zgjedhje të reja.
Në lidhje me këtë temë, njohësi i çështjeve politike, Muhamet Kelmendi, në një prononcim për “Bota sot”, u shpreh që nëse partitë duan të mos shkojnë në zgjedhje atëherë ekziston mundësia me ligj që të votohet presidenti nga deputetet në Kuvendin e Kosovës. Sipas Kelmendit këtë të drejtë e ka çdo parti të bëjë. Nuk ka fare rëndësi se cila parti është e para, e dyta.
“Në kuadër të Ligjit ekziston vetëm një mundësi që vendi të mos shkojë në zgjedhjet e jashtëzakonshme. Në këtë anë është marrëveshja midis subjekteve politike për të siguruar numrin e votave në Kuvend për president. Kushtetuta përcakton tri raunde të zgjedhjes për president. Kjo kërkohet, nëse nuk dëshirohet të shkohet në zgjedhje, të sigurojnë partitë në Kuvendin e Kosovës. Këtë të drejtë e ka çdo parti të bëjë. Nuk ka fare rëndësi se cila parti është e para, e dyta apo e treta”, thotë Kelmendi.
Tutje Kelmendi shprehët që marrëveshjen për president mund të bëjë VV, LDK, PDK, AAK, pra kush i bënë votat e paraqet propozimin për kryetar dhe zgjidhet me 2/3 e votave të të gjithë deputetëve të Kuvendit të Kosovës.
Kjo sipas njohësi të çështjeve politike është e vetmja zgjidhje nëse nuk duan të shkojnë në zgjedhje të jashtëzakonshme.
“Zgjedhja e presidentit nuk varet nga koalicioni qeveritar. Marrëveshjen për president mund të bëj VV, LDK, PDK, AAK etj. Kush i bënë votat e paraqet propozimin për kryetar dhe zgjidhet me 2/3 e votave të të gjithë deputetëve të Kuvendit të Kosovës. Natyrisht se për këtë postë ka shprehur interes edhe Isa Mustafa, sikundër Ramush Haradinaj dhe natyrisht edhe PDK e VV kanë pretendime. Këtej do të bëhen diskutimet dhe këtu lypset gjetur kompromisin. Në të kundërtën vendi shkon në zgjedhje të jashtëzakonshme”, përfundon Kelmendi për “Bota sot”.