Flakron Shala, djali i deputetit Haxhi Shala, u emërua konsull në Ambasadën e Kosovën në Pragë, Çeki, ditë më parë.
Reagime të shumta pati sapo lajmi u bë publik.
Derisa kryeministri u deklarua se nuk ka qenë i informuar, U.D e presidentit të Kosovës, Vjosa Osmani, e shkarkoi Shalën dhe tre konsuj të tjerë.
Lidhur me këtë, njohësi i çështjeve politike, Islam Krasniqi, ka thënë për gazetën “Bota sot” se rasti i fundit është vazhdimësi e asaj që jemi mësuar ta shohim në të kaluarën, ku nepotizmi dhe familjarizimi ka mbizotëruar gjithkund.
“Veprimi i fundit lidhur me emërimin konsull në Ambasadën e Kosovës në Pragë të djalit të Haxhi Shalës është veç një vazhdimësi e asaj që jemi mësuar ta shohim në të kaluarën, ku nepotizmi dhe familjarizimi ka mbizotëruar gjithkund”, është shprehur ai.
Sipas Krasniqit, tani po kuptohet se cili ka qenë qëllimi i votës nga Shala për krijimin e qeverisë.
“Tani po kuptohet se cili ishte qëllimi i votës për krijimin e qeverisë, ku z. Shala i premtoi ish presidentit Thaçi dhe ish kryeministrit Haradinaj , ajo ju shpërblye, nuk kishte qenë në pyetje gjygymi me çaj siç e citonte z. Shala, por qëllimi i interesit”, ka vlerësuar Krasniqi.
Ai shton se ka ardhur koha që qytetarët të vetëdijësohen dhe ta ndëshkojnë këtë klasë politike.
“Ka ardhur koha që edhe qytetarët të vetdijësohen nga kjo klasë politike e cila po vepron në bazë të traditës, siç citohet ajo thënia “Ujku qimen e ndërron, por zanatin se harron”, sa më parë duhet t’i ndëshkojmë këtë klasë politike me votën tonë, duke i shpërblyer edhe ne për punën dhe veprimet e tyre, duke i pensionuar”, ka deklaruar Islam Krasniqi për “Bota sot”.