Nuk ekziston kurrëfarë alternative në marrëdhëniet BE-ShBA as afatshkurtër as afatmesme, theksohet në propozimin e fundit të Komisionit Evropian dhe përfaqësuesit të lartë të BE-së për punë të jashtme dhe politikë të sigurisë Josep Borrell, i cili propozon një strategji për një axhendë të re transatlantike dhe marrëdhënie midis partnerëve transatlantikë.
Propozimi ka ardhur në pritje që transatlantiku i vërtetuar Joe Biden të marrë drejtimin amerikan më 20 janar 2021, thotë për Zërin e Amerikës Ivan Vejvoda, bashkëpunëtor i vjetër i Institutit të shkencave humane të Vjenës dhe njohës i rrethenave të Evropës.
"Ajo që vjen me administratën e Bidenit është njohja dhe kthimi në faktin se marrëdhënia transatlantike është marrëdhënia më e fortë dhe më domethënëse midis forcave të të dy anëve të Atlantikut. Ato ndajnë vlerat kryesore demokratike dhe sundimin e ligjit në një kohë kur këto vlera po vihen në dyshim nga vendet e treta, kryesisht Kina. Unë mendoj se kjo do të jetë lidhja kryesore në kërkimin e asaj marrëdhënieje më të qëndrueshme midis dy anëve të Atlantikut ".
Kur bëhet fjalë për Bidenin dhe Ballkanin Perëndimor, Vejvoda thekson:
"Ky është sigurisht presidenti i ardhshëm i SHBA-së Joseph Biden, i cili ka përvojën më të madhe me Ballkanin. Ai ka qenë prej kohësh në politikën e jashtme dhe në Senatin e SHBA-së. Ka udhëtuar në Ballkan shumë herë në 25 vitet e fundit. Njeh shumë nga aktorët, si edhe sekretari i ardhshëm i shtetit Anthony Blinken, i cili është gjithashtu nga afër i njohur me të gjitha detajet e kësaj çështjeje dhe në këtë kuptim kjo është një administratë tjetër".
Si do të pritet Bideni nga pala serbe dhe kosovare?
Kjo është një kohë e re, një administratë e re dhe ajo që kemi dëgjuar nga Uashingtoni nga administrata e ardhshme është njohja e rolit udhëheqës të Bashkimit Evropian. Në fund të fundit, kjo është arsye e shëndoshë, sepse Ballkani Perëndimor është pjesë e asaj që unë e quaj thelbi i gjeografisë evropiane, dhe madje edhe i gjeopolitikës së Evropës. Baza e politikës do të jetë integrimi i Ballkanit Perëndimor në integrimin euro-atlantik sa më shpejt të jetë e mundur. Mbi të gjitha, gjatë kësaj periudhe, pamë që Mali i Zi dhe Maqedonia Veriore u bënë anëtare të plota të NATO-s, ashtu si edhe Shqipëria. Pra, gjysma e atyre vendeve janë tashmë pjesë e integrimit euro-atlantik. Shumë janë në rrugë.
Cilat janë perspektivat e Bashkimit Evropian për të përshpejtuar integrimin e Ballkanit Perëndimor dhe cilat janë përparësitë kryesore?
Bisedimet për normalizimin e marrëdhënieve midis Serbisë dhe Kosovës kanë vendin e parë në axhendë kur bëhet fjalë për angazhimin evropiano-amerikan në rajon. Unë mendoj se është shumë e rëndësishme që Shtetet e Bashkuara të vendosin të hapin një Zyrë për ndihmë ndërkombëtare të zhvillimit për të investuar fonde serioze në rajon (emri zyrtar: Koroporata zhvillimore financiare), kryesisht në infrastrukturë, prodhim dhe më shumë. Është hap serioz dhe përgjigje ndaj asaj që quhet hyrja dhe ndikimi i aktorëve të tretë, kryesisht u referohet Rusisë, Kinës, Emirateve dhe Turqisë.
