Një parlament i ri do të zgjidhet në Kosovë më 14 shkurt. Presidentja e përkohshme Vjosa Osmani vendosi këtë datë për zgjedhjet e parakohshme të mërkurën - pasi Gjykata Kushtetuese në Prishtinë deklaroi të pavlefshme formimin e qeverisë së kryeministrit Avdullah Hoti nga parlamenti në qershor. Kështu shkruan gazeta austriake “Der Standard”, përcjell Bota sot.
Media citon se Osmani shpërndau zyrtarisht parlamentin të mërkurën në mbrëmje dhe sipas një deklarate nga zyra e saj, urdhëroi zgjedhje të reja për 14 shkurt.
“Gjykata Kushtetuese kishte justifikuar anulimin e zgjedhjeve duke deklaruar se një anëtar i parlamentit, i cili ishte dënuar për korrupsion kishte marrë pjesë në votimin e qeverisë. Hoti u zgjodh vetëm me shumicën e një vote”, shkruan “Der Standard”.
Interesim i zbehur
“Që nga pavarësia nga Serbia në vitin 2008, ende nuk ka pasur një qeveri në Kosovë që të qëndronte në detyrë deri në fund të periudhës legjislative. Sekuenca e zgjedhjeve të parakohshme ka çuar në një rënie të interesimit në mesin e popullatës. Problemet kryesore të vendit, përfshirë varfërinë e përhapur dhe mangësitë në sistemin shëndetësor, nuk janë adresuar në mënyrë efektive nga qeveritë”, shkruan më tej gazeta.
Sipas “Der Standard”, përcjell Bota sot, “zgjedhjet e reja parlamentare vijnë në një kohë kur Kosova po përpiqet të normalizojë marrëdhëniet e saj me Serbinë, e cila deri më sot nuk ka njohur pavarësinë e ish-provincës së saj.”/BS
