Presidenti i Serbisë, Aleksandër Vuçiq është rikthyer përsëri me kërcënime me luftë ndaj shtetit të Kosovës.
“Një konflikt i ngrirë do të thotë të presësh që dikush të nxjerrë i pari shpatën, nuk do të doja që bijtë e mi të shkojnë në luftë. Nuk duhet të na hyjë gjaku në trurin tonë, duhet të jemi realistë, njerëzit duhet të dinë se cilat janë të gjitha rreziqet e një konflikti të ngrirë. Shqiptarët nuk janë në thelb të gatshëm për një zgjidhje kompromisi”, është shprehur presidenti serb, Aleksandër Vuçiq.
Lidhur me kërcënimet e presidentit serb ndaj Kosovës, për gazetën “Bota sot” ka folur profesor, doktor Enver Bytyçi.
“Presidenti serb, Aleksandër Vuçiç, përsëri ka përdorur sot kombinimin e gjuhës kërcënuese me atë "pajtuese" sa i përket zgjidhjes së konfliktit midis Kosovës dhe Serbisë. “Një konflikt i ngrirë do të thotë të presësh që dikush të nxjerrë i pari shpatën", ka thënë ai. Ndërkaq ka paralajmëruar se nëse Kosova anëtarësohet në ndonjë organizatë ndërkombëtare, atëherë Beogradi do ta bëjë të pendohet. Kjo deklaratë ngjan e rekorduar më kërcënimin që në një mënyrë tjetër bëri disa ditë më parë Baton Haxhiu. Haxhiu tha se “Kush voton Albin Kurtin të bëhet gati të shkojë të luftojë në veri”! D.m.th sipas Batonit, shpatën po e nxjerrka zoti Kurti, nëse fiton zgjedhjet dhe nëse ndodh kjo këshilltari i Vuçiç dhe Edi Ramës fajëson e madje I kërcënon zgjedhësit, qytetarët e Kosovës”, thotë Bytyçi.
Sipas tij, Vuçiq është në koordinim me Baton Haxhiun.
“Nuk elaborova më lart për të thënë se kush fiton e kush humb në zgjedhjet e 14 shkurtit. Por dua të theksoj faktin që Vuçiç i akordon telat e violinës me Baton Haxhiun, me qëllim që presionet e kërcënimet e tij të dublohen në atë mënyrë sa të kenë efekt jo vetëm te opinion publik, por edhe te liderët politikë të tipit Hashim Thaçi. E përsëris, është vetëm presion dhe luftë nervash, sepse një vend që merr pjesë në operacionet paqeruajtëse në botë përkrah ushtrisë amerikane, nuk ka asnjë shans të ketë nevojë të përdorë shpatën e hekurit për të drejtën e vet. I mjafton shpata e fjalës, arsyes dhe argumentit në të drejtën. Ndaj dhe Vuçiç fill më pas kërkoi lëshime nga Kosova, duke folur jo vetëm për forcën e Serbisë, por edhe për "mençurinë e racionalitetin" e saj. "E di që nuk mund të marrim gjithçka , por ne mund të jemi po aq të kënaqur ose të pakënaqur sa shqiptarët", deklaroi Vuçiç. Madje përmendi se rregullimi i kufijve do të ishte një mënyrë për të qenë të dy palët të kënaqura ose të pakënaqura në të njëjtën masë”, shton profesor Bytyçi për gazetën “Bota sot”.
Bytyçi deklaron se Serbia refuzon të njohë krimet dhe gjenocidin e kryer në Kosovë.
“E zbërthyer në terma konkretë, kjo deklaratë e kreut të shtetit serb përjashton ndjesën e tij për krimet dhe mizoritë e shtetit serb kundër shqiptarëve. Serbia nuk ka ndërmend të njohë krimet kundër njerëzimit dhe gjenocidin e egër që ka ushtruar në Kosovë jo vetëm në dy vitet e luftës së fundit 1998-1999, por që nga viti 1876, kur kreu aktin e parë të gjenocidit kundër shqiptarëve në Nish e rrethinat e tij. Pendesa është e duhet të jetë kushti kryesor për shqiptarët, me qëllim që të flitet për pajtim. Nuk ka ndodhur në historinë e njerëzimit që dhunuesi të diktojë paqen pa kërkuar ndjesë për dëmet që I ka shkaktuar viktimës së tij. Nëse ndodh kjo, d.m.th nëse ndodh që viktima të pajtohet me faljen, edhe të territorit, pa ndjesën e agresorit, atëherë fajtor nuk është më Serbia për krimet në Kosovë, por është vetë Kosova. Të pranosh kushtet e agresorëve për paqe, është vetëvrasje”, thekson Bytyçi.
Sipas tij, deklaratat e Aleksandër Vuçiqit janë pasojë e politikave të kompromisit të Hashim Thaçit.
“Nëse Vuçiç do të pranonte krimet kundër njerëzimit në Kosovë, ai nuk mund të fliste me gjuhën e zgjidhjes së të kënaqurit ose të pakënaqurit të barabartë. Beogradi e qeveria e tij vazhdojnë përpjekjet për ndarjen e Kosovës. Kjo është pasojë e politikave të kompromisit të Hashim Thaçit. Tani kushtet kanë ndryshuar por nuk duhet të harrojmë se ish-presidenti i Kosovës ka lënë trashëgimtarë të tjerë të lidhur me Serbinë për t’i shërbyer asaj. Janë disa ose ndoshta të gjithë ish-këshilltarët e tij, të cilët bënë gramafonin prishës në ndihmë të shefit të tyre për ndarjen e Kosovës. Gjallërohen Brenda natës si kërmijtë në ditë shiu të gjithë taborët pro-serbe në Prishtinë, në Tiranë e gjetkë për ta realizuar projektin e Vuçiç. Nëse nuk do të kishte bashkëpunëtorë ndër shqiptarët, presidenti serb nuk do të fliste edhe njëherë për ndarjen e territorit shqiptar të Kosovës”, thotë për “Bota sot”, profesor Enver Bytyçi, duke treguar edhe qëllimin e Vuçiqit.
“Konflikti i ngrirë nuk sjell te shpatat. Kjo është tashmë e ditur. Aleksandër Vuçiç thjesht bën diversion për të ngjallur frikë te ndonjë shqiptar frikacak, te ndonjë politikan i korruptuar dhe I kapur, te disa ndërkombëtarë që shohin vetëm luftë e konflikt në Ballkan e kështu me radhë. Ndërkaq ai synon të kënaqë nacionalistët ekstremë e fashistë të Serbisë, kur përmend luftën, shpatat, topat, avionët, mitralozët e kallashnikollët. Por duhet bërë kujdes për ndonjë skenar të ndonjë konflikti të vogël, sa për të tërheq vëmendjen e komunitetit ndërkombëtar sa I përket kërkesës që Vuçiç bën për rishikimin e qëndrimeve të tij për vizatimin apo rishikimin e kufijve midis dy vendeve siç thotë ai”.
Bytyçi shprehet se në këto kushte, institucionet e Kosovës janë të obliguar të ndërtojnë një platformë, me të cilën të detyrojnë Serbinë të kërkojë ndjesë për krimet e paimagjinueshme kundër shqiptarëve dhe t'i kërkojnë botës së qytetëruar dënimin e këtyre krimeve.
“Kjo platformë duhet të ketë konsensusin e të gjitha forcave politike, të të gjithë deputetëve të Kosovës që do të dalin nga zgjedhjet e reja dhe gjithashtu mbështetjen e të gjithë qytetarëve të vendit. Në projektin e shqiptarëve duhet përjashtuar kategorikisht ndryshimi I kufijve dhe ajo që Albin Kurti e quan Zajednicë. Ndërkaq shteti shqiptar nga ana e tij duhet të marrë dosjen e këtyre krimeve serbe kundër shqiptarëve nga autoritetet e Kosovës dhe ta bëjë gati padinë për kallëzimin penal të shtetit serb në Gjykatën Ndërkombëtare të Drejtësisë. Akuza është e qartë: Krime kundër njerëzimit, gjenocide mbi njerëzit për shkak të përkatësisë së ndryshme etnike, gjenocide kulturor dhe përpjekje për të zhdukur jo vetëm popullsinë shqiptare, por edhe trashëgiminë e pasuritë e saj në Kosovë”, shton Bytyçi.
“Por para se të ndodhë kjo, kryeministri Rama duhet të deklarohet publikisht se ka heq dorë nga përkrahja e Vuçiç në projektin serb për ndarjen e Kosovës! Nëse kryeministri i vendit ti, vendit tonë, vijon edhe më tej të mbështesë Beogradin dhe presidentin serb në projektet e Serbisë kundër Kosovës, duke filluar e minishengenin, atëherë shteti shqiptarë do të vazhdojë të mbetet palë me armiqtë e kombit shqiptar, që flasin për shpata e për luftë, me autoritetet e Serbisë!”, përfundon për “Bota sot”, profesor, doktor Enver Bytyçi.
