Kosova gjatë mbrëmjes së djeshme shënoi fundin e “tensioneve” politike që ndodhën këto ditë.
Ishte Lëvizja Vetëvendosja në pushtet me ndihmën e Lidhjes Demokratike të Kosovës në opozitë, që arriti t'i sigurojë votat e mjaftueshme për ta zgjedhur Vjosa Osmanin Presidente të Republikës së Kosovës.
Vjosa Osmani, e cila në zgjedhjet e 14 shkurtit garoi për deputete me listën Vetëvendosja, për zgjedhjen e saj Presidente në Kuvendin e Kosovës mori 71 vota, nga 82 deputetë sa morën pjesë në votim.
Ajo u zgjodh presidente e Kosovës në raundin e tretë të votimit, derisa në dy raundet e para nuk i pati votat e mjaftueshme.
Mirëpo në mesin e tërë kësaj “zhurme” padyshim që kanë qenë disa pika të cilat morën vëmendjen e opinionit publik, shkruan “Bota sot”.
Ishte pjesëmarrja e deputetes së AAK-së, Albena Reshitaj e më pas edhe kalimi i deputetes Adelina Grainca, nga PDK në VV.
Të dyja këto votuan pro Osmanit presidente, duke mos përfillur qëndrimet e partive të tyre.
Të dy deputetet u shprehën se në rend të parë ishte populli dhe kjo ishte arsyeja e pjesëmarrjes së tyre në votimin për president.
Ndërsa, njohësit e çështjeve politike për “Bota sot”, janë shprehur shumë optimistë për Osmanin si presidente, duke uruar që të sjellë ndryshimin e shumë pritur për vendin tonë.
Gjithashtu, ata vlerësojnë lart gjestin e deputeteve që morën pjesë në votimin për presidentin.
Qarri: Osmani do të jetë presidentja që do e ndihmojë Kosovën të zgjedh problemet në Kosovë
Njohësi i çështjeve politike, Gani Qarri në një prononcim për “Bota sot”, është shprehur se Osmani është zgjedhur presidentja e vendit, e cila ka marrë e vetme mbi 300 mijë e 756 vota.
Qarri ka vlerësuar se femrat në Kuvendin e Kosovës do të sjellin suksesin në vendin tonë duke larguar kështu atë të cilët qe 21 vite kanë kurthuar politikën në vendin tonë.
“Dr. Vjosa Osmani është kandidatja më e votuar e të gjitha kohëve në vend, prej se mbahen zgjedhje të lira e demokratike në krejt vitet e pasluftës, në Kosovën e pavarur. Ajo ka marrë e vetme mbi 300 mijë e 756 vota nga qytetarët anë e mbanë vendit, ndaj parë jo vetëm nga votimi i sotëm, por edhe besimi i madh që kanë shprehur qytetarët e Kosovës ndaj saj, ajo është presidentja më e denjë e Kosovës, që nga Dr. Ibrahim Rugova e këndej. Kurse faktorët vendimtar që bënë serish të dështojnë partitë e inkriminuara në skenarët e tyre të zinj, ishin dy deputete të ndritshme femra të Kuvendit të Kosovës, të cilat rrezikuan edhe përjashtimin nga ish partitë ku gravitonin, që vendi të bëhej në afatin e rregullt ligjor me president të shtetit. Ato dëshmuan edhe një herë më tepër se, aty ku vendosin femrat e Kosovës, aty është i garantuar suksesi dhe zgjidhja e problemeve, sado të vështira e të koklavitura që mund të jenë. Zgjidhja dhe zbërthim i "Nyjeve Gordiane", në dukje komplekse dhe të pazgjidhshme, kundër vendit, të cilat siç jemi mësuar ti shohim gjatë mese 21 viteve të kaluara, i kurthojnë burrat e pa hajr të këtij vendi, të cilët për fat të keq qëndrojnë edhe në krye të partive të inkriminuara, që për dy dekada e kanë sjellë vendin në këtë gjendje të pa rrugëdalje”, është shprehur Qarri.
Më tej, analisti ka thënë se Osmani është një presidente e zgjedhur në mënyrë të rregullt e jo të dalë për shkak të problemeve dhe se ka tejkaluar shumë kandidatë por vet partitë si segmente politike duke i lënë nën hije.
“Dr. Vjosa Osmani është një presidente e zgjedhur në mënyrë të rregullt, jo e dalë për shkak të problemeve , Ad-hoc nga zarfi, apo e katapultuar me manipulime nga partitë e inkrimnuara, por e zgjedhur në mënyrë të rregullt dhe e miratuar me shumicë mbizotëruese të vullnetit të lirë të qytetarëve, e "imponuar" nga numri i madh i votave të marra, me të cilat ka tejkualur për shumë herë, jo thjeshtë vetëm kandidatët, por edhe vet partitë si segmente politike më vete, duke i lënë ato tërësisht nën hije dhe të turpëruara në dëshpërimin e tyre të thellë, me debaklin e rëndë që kanë pësuar në zgjedhjet e 14 shkurtit”, theksoi analisti.
Tutje, Qarrit ka vlerësuar se përveç Osmanit heroina të mbrëmshme janë edhe Adelinë Grainca nga PDK dhe Albena Reshitaj nga AAK, të cilat rrezikuan të përjashtohen edhe nga partitë ku gravitonin, duke u dhanë shembull burrave tekanjoz.
Gjithashtu, ai cek që në këto situata duhet të lihen anash inatet politike dhe të vendoset për të mirën e vendit.
“Ndërsa heroinat e votimit dhe suksesit për zgjedhjen e presidentes në kohë dhe mënyrë të rregullt, pa asnjë dyshim, ishin serish dy femra tjera të ndritshme të vendit, dy deputete të ndershme dhe personalitete të suksesshme të Kosovës, si Adelinë Grainca nga ish PDK dhe Albena Reshitaj nga ish AAK, të cilat rrezikuan të përjashtohen edhe nga partitë ku gravitonin, duke u dhanë shembull burrave tekanjoz e puro delenxhi në kuvend dhe jashtë tij, se si, kur është në pyetje shteti dhe ngritja e institucioneve të vendit, duhet të tejkalohen dallimet partiake dhe lihen anash, inatet politike, duke bërë që të duartrokiten nga mbarë populli i Kosovës me një falënderim të veçantë, të cilat qysh tash, elektorati duhet ti mbajë mend e mbështesë dhe shpërblejë me vota në zgjedhjet e ardhshme, për sakrificën që bënë dhe dinjitetitn që dëshmuan, për hir të vendit dhe stabilitetit politik të Kosovës”, ka potencuar Qarri për “Bota sot”.
Zeqa: Presidentja e re duhet të mos ndikohet dhe as t'i ndikojë të tjerët
Analisti politik, Florim Zeqa, në një bashkëbisedim me “Bota sot” ka folur në lidhje me përzgjedhjen e Osmanit si presidente e vendit duke e parë një kapitull të ri në politikën e Kosovës.
Se sa do të jetë Osmani e gatshme t’i mbajë premtimet, ai thotë se mbetet të shihet nga mandatin e saj 5 vjeçar.
“Fillimisht duhet përshëndetur përmbylljen e suksesshme të krijimit të institucioneve të reja të shtetit tonë. Edhe pse zgjedhja e presidentes nuk u bë në mënyrën më të mirë dhe më të dinjitetshme, u përmbyll një cikël i vështirë dhe u hapë një kapitull i ri në politik-bërjen kosovare. Është bërë e vështirë të parashikohen gjërat në politik-bërjen kosovare në afate më të shkurtra kohore, e lërë më për pesë vitet e ardhshme. Se sa do të jetë e dinjitetshme presidentja e re Vjosa Osmani në mandatin pesë vjeçar varet nga pozicionimi i saj karshi subjekteve politike në njërën anë dhe karshi mbajtjes së premtimeve elektorale në luftën kundër nepotizmit, korrupsionit dhe krimit të organizuar”, ka thënë Zeqa.
Nga ana tjetër, ai shton se Osmani duhet të shkëputet nga pjesëmarrja në aktivitetet partiake dhe të mos ketë afërsi me liderët e caktuar partiak e aq më pak t’i mbështes, pasi që është person unifikues i skenës politike.
“Vjosa Osmani nga dita e parë e punës së saj si presidente e vendit duhet të shkëputet nga pjesëmarrja në aktivitete partiake dhe nga afërsia me liderë të caktuar partiak, që i bie, të mos mbështesë agjenda të caktuara partiake, por t'i qëndroj besnike agjendës shtetërore dhe obligimeve kushtetuese si person unifikues i skenës politike kosovare dhe të luaj rolin e saj neutral ndaj zhvillimeve në Kuvendin e Kosovës dhe institucioneve të pavarura të shtetit”, ka vlerësuar analisti.
Ndër të tjera, ai shton se Osmani duhet të mos ndikohet nga të tjerët për kryerjen e funksioneve shtetërore sepse kthimi i besimit të qytetarëve në institucionin e presidentit është në dorën e Osmanit.
“Pra, presidentja e re duhet të mos ndikohet dhe as t'i ndikojë të tjerët në kryerjen e funksioneve shtetërore, të mos bëjë dekretime partiake dhe familjare në institucione të larta të shtetit, në ambasada dhe konsullata, në borde dhe agjencione por të kërkojë zbatohen në përpikmëri kushtet e parapara ligjore. Kthimi i besimit të qytetarëve në institucionin e presidentit dhe përmirësimi i imazhit të shtetit të Kosovës në arenën ndërkombëtare është në dorën e zonjës Vjosa Osmani. Ashtu siç ishin premtimet e mëdha të zonjës Osmani, të mëdha janë edhe pritjet e qytetarëve”, ka deklaruar Florim Zeqa për “Bota sot”.
Ndryshe, Vjosa Osmani ka mandat pesë vjeçar si presidente.
