Kryetari i Aleancës për Ardhmërinë e Kosovës, njëherit edhe ish kryeministër i vendit, Ramush Haradinaj po vazhdon me sulme dhe akuza në drejtim të kryeministrit Albin Kurti.
Së fundi, Haradinaj e ka quajtur mashtrues, duke thënë se shteti nuk udhëhiqet me fjalë, por me punë.
“Dikur e kundërshtoje ashpër taksën e Rrugës së Kombit dhe unë atëherë isha me ty! Por ti nuk paske qenë i sinqertë, sepse ndryshe nuk kishe vendosur që shtresës së mesme të popullit, e për hesap të oligarkëve, me ia marrë edhe nga 5 euro nga xhepi. Edhe kjo “nalepnica jote” ka mundur të kushtojë 1 euro, por ti paske hesape të tjera. Dikur veç unë të quaja mashtrues e tani numri atyre që të cilësojnë si mashtrues është tepër i madh! Zbrit në tokë o Kryeministër se Shteti nuk udhëhiqet me llafe, sado të bukura qofshin ato, por me punë! E ju çdo punë po e keni të ligë, siç e ligë është edhe kjo hajnia prej 5 eurosh!”, ka shkruar Ramush Haradinaj në drejtim të kryeministrit, Albin Kurti.
E krejt këto sulme të Haradinajt në drejtim të Kurtit, sipas analistit Faton Mehmeti, janë dëshmi se AAK po shkon drejt rënies edhe më të madhe.
“Ramushi është i vetëdijshëm se partia e tij është në rënie me mundësi të madhe të shuhet. Në këtë kuptim duhet të themi se me këto veprime Haradinaj synon të mbaj anëtarësinë e AAK në këmbë, krejt kjo si pasojë e largimeve masive që po ndodhin në partine e ish kryeministrit Haradinaj”, thotë Mehmeti për gazetën “Bota sot”.
Sipas tij, Haradinaj po synon të faktorizohet duke u marr me Kurtin, por që ky i fundit nuk po bie në grackën e tij.
“Ramushi synon të bëhet faktor duke u marr me Albinin me shpresën se Albini do fillojë të merret me të, me heshtjen e tij Albini po e demolon Ramushin dhe kundërshtarët e tij. Kurti nuk po bie në grackën e tij. Me taktikën e Rugovës Albini vetëm sa po rritet më shumë, derisa AAK po shkon drejt shuarjes totale”, përfundon analisti politik, Faton Mehmeti.
