Publicisti nga Shqipëria, Rexhep Shahu e ka quajtur të pakuptimtë mos reagimin e qeverisë Rama për dënimin me 746 vjet ndaj 37 shqiptarëve, të cilët u përfshinë në përleshje të armatosur me forcat maqedonase në “Lagjen e Trimave” në Kumanovë.
Në një prononcim për “Bota sot”, Shahu ka thënë se Qeveria e udhëhequr nga Rama më parë përgjigjet për ngjarjet botërore që nuk ndërlidhen fare me Shqipërinë, se sa për dënimin e 37 shqiptarëve për rastin Kumanovë.
“Qeveria e Tiranës më parë prononcohet për ngjarjet në Angola se sa për ngjarjet ku jetojnë shqiptarët në hapësirat e tyre jetike natyrale”, ka thënë Shahu për “Bota sot”.
Sipas tij, shqiptarët e Kumanovës dhe të Maqedonisë janë të huaj për Qeverinë e Shqipërisë.
“Qeveria e Presidenca e Shqipërisë nuk bëjnë asgjë nëse nuk kanë shumë leverdi politike, nuk bëjnë asgjë, sepse grupi i Kumanovës është i huaj për to, vetë Kumanova është e huaj dhe e largët për ta. Shqiptarët e Kumanovës, të Maqedonisë, e të tjerë janë të huaj për Qeverinë e Shqipërisë dhe autoritetet aktuale të Tiranës zyrtare”, ka shtuar Shahu.
Ndryshe, të enjten Gjykata në Shkup ka dënuar me 746 vjet, 37 shtatë shqiptarë, të cilët u përshinë në konfliktin e armatosur në “Lagjen e Trimave” në Kumanovë. Nga 37 pjesëtarët e dënuar, shtatë të akuzuar janë dënuar me burg të përjetshëm, 13 me nga 40 vjet burg, kurse të tjerët me nga 20 vjet, 18 dhe 12 vjet.
