Deklarata për ndarje apo shkëmbim territoresh me Serbinë janë rikthyer si temë shqetësuese sa për qytetarët, ashtu edhe për ekspertët e sigurisë.
Ditë më parë, Presidenti i Kosovës, Hashim Thaçi, tashmë edhe publikisht ka pranuar mundësinë e shkëmbimit të territoreve me Serbinë.
Presidenti i Republikës, Hashim Thaçi për herë të parë ka pranuar publikisht mundësinë e shkëmbimit të territoreve me Serbinë. Duke komentuar kërkesën e Lutfi Hazirit për të shkëmbyer Luginën e Preshevës me Veriun, Presidenti ka premtuar se do ta trajtojë seriozisht këtë ide.
Kjo ide është duke u kundërshtuar nga ekspertët e sigurisë që thonë, se spektri politik në Kosovë duhet të largohet nga çfarëdo “loje” në drejtim të destabilizimit të vendit në aspektin politik dhe të sigurisë në aspektin e brendshëm dhe të jashtëm.
Drizan Shala ekspert sigurie, çështjen për ndarje apo shkëmbim territoresh e konsideron politikë ruse, e cila para zgjedhjeve amerikane dëshiron të krijojë një situatë në Kosovë dhe Serbi sikur në vitet 1999- 2004.
Faktori evropian nuk dëshiron konflikte, prandaj, sipas Shalës, Kosova nuk duhet të bëjë ndonjë kompromis të mundshëm për njohje nga Serbia sikurse është modeli Bosnjë- Hercegovina.
“Situata e krijuar para dhe pas takimit të Helsinkut në mes Trumpit dhe Putinit e riktheu temën e shkëmbimit të territorit , statusit special, kompromiseve në mes Kosovës dhe Serbisë. Kjo është një ofenzivë e fundit e politikës ruse e cila para zgjedhjeve të ardhshme amerikane do që të krijojë një situatë në Kosovë- Serbi sikur ajo e viteve 99/2004! Prandaj faktori evropian nuk e dëshiron një lëvizje të kufijve në këtë kohe në një rajon ku konsiderohet si "barut" i konflikteve me përmasa më të gjëra. Kësisoj, Kosova assesi nuk duhet që vendimin e GJND-së ta shkel si një "kompromis" të mundshëm për të pasur njohje reciproke të modelit Bosnjë- dhe Hercogovinë. Spektri politik në Kosovë duhet që të largohen nga çfarëdo "loje" në drejtim të destabilizimit të vendit në aspektin politik dhe të sigurisë në aspektin e brendshëm dhe të jashtëm të Kosovës”, thotë Shala për “Bota sot”.
Ideja për ndarje territoresh në mes Kosovës dhe Serbisë, janë kundërshtuar sot edhe nga zëvendësministri i FSK-së, i cili i ka quajtur mendësi të së kaluarës.