Analisti politik, Ali Hertica, në një prononcim për gazetën “Bota sot”, thotë se përplasjet mes pozitës dhe opozitës janë tregues se situata në vend është duke u tensionuar tej mase.
“Tani ngritja e teheve të shpatave në mes pozitës dhe opozitës tregon se situata është duke u tensionuar tej mase. Fyerjet e shumta që i kanë shkëmbye mes vete këto dy palë janë sinjale të turpshme dhe të rrezikshme, pasi që kjo mund të dërgojë në një situatë të rëndë politike shtetin e Kosovës nga kjo kastë e përlyer nga krimet ekonomike dhe politike”, thotë Hertica.
Tutje, ai thotë se, zvarritja e thirrjes së seancës konstituive, lënë shumë dyshime që koalicioni aktual nuk i ka numrat e nevojshëm.
“Sa i përket numrave të “PAN”, u deklarua në fillim të seancës së djeshme se i kanë 61 vota, por nuk besoj se ky koalicion nga ajo që kanë thënë se i kanë pasur prej ditës së parë. Mirëpo, vet zvarritja e thirrjes së seancës konstituive lënë shumë dyshime që këta në fakt nuk i kanë numrat dhe nuk besojë se do kenë hapa drejt votës për këtë ekip të “unitetit” siç e quajnë ata, sepse kjo qeveri është e pakicës dhe jo e 81 deputetëve. Kështu që tani fillon loja me Listën Serbe, ku do të kushtëzojnë “PAN-in” për t’i marrë votat”, ka përfunduar Ali Hertica për “Bota sot”.
Ndërkohë, kujtojmë se dje kryetari i Kuvendit të Kosovës, Kadri Veseli, kishte bërë të ditur se seanca e jashtëzakonshme do të vazhdojë për sot, në ora 14.00, pasi bojkoti dhe mungesa e gatishmërisë së opozitës ka krijuar edhe një situatë të mungesë së konsensusit të marrjes së vendimit për ekipin negociator në dialogun me Serbinë në Bruksel.