Kryetari i Lidhjes Demokratike të Kosovës, Isa Mustafa, i ka shkruar letër Kancelares Gjermane Angela Merkel dhe ministrave të jashtëm të 28 vendeve të Bashkimit Evropian, duke i njoftuar me vlerësimet e LDK-së ndaj situatës aktuale në Kosovë dhe procesit të dialogut me Serbinë.
E, lidhur me këtë çështje, ka folur politologu i njohur në vend.
Albinot Maloku në një prononcim për “Bota Sot”, ka thënë se Gjermania është nga të vetmet vende që në raport me Republikën e Kosovës ka një qëndrim të qartë.
“Gjermania është nga të vetmet vende që në raport me Republikën e Kosovës ka një qëndrim të qartë. Gjermania e ka njohur dhe vendos marrëdhënie diplomatike me Kosovës duke respektuar shtetin e Kosovës me të gjitha atributet përcjellëse”, ka thënë Maloku.
Sipas politologut, shteti gjerman është nga vendet e vetme që gjithashtu më shumë i ka respektuar parimet sesa ndonjë interes specifik në lidhje me Kosovën.
“Qëndrimi i Gjermanisë ka ditur të jetë i prerë edhe me Serbinë dhe padyshim se kjo sjellje e Gjermanisë në raste bie edhe më miqësore ndaj Kosovës e kufijve të saj edhe se vet lidershipi politik i vendit. Gjermania është nga vendet e vetme që më shumë i ka respektuar parimet sesa ndonjë interes specifik në lidhje me Kosovën. Kësaj qasje duhet ti jemi shumë falënderues”, ka përfunduar Maloku për “Bota sot”.
