Së fundmi mes presidentit Hashim Thaçi dhe kryeministrit Ramush Haradinaj ka pasur përplasje për çështjen e korrigjimit të kufijve.
Lidhur me këtë, deputeti nga radhët e Lidhjes Demokratike të Kosovës, Haxhi Avdyli, ka thënë për gazetën “Bota sot” se Thaçi është shndërruar në rrezik të vendit, duke u bërë argat i agjendës së Vuçiqit.
“Ideja e rrezikshme e Hashim Thaçit për shkëmbim apo falje të territoreve po pëson fiasko. Se çfarë zori ka ky president që katandis për tu bërë argat i agjendës së Vuçiqit nuk e di, por një po shihet se është shndërruar në rrezik të vendit”, është shprehur ai.
Ndërsa, sa i përket Haradinajt, Avdyli thotë se pavarësisht të gjithave, ai për dallim nga Thaçi ka ndjenja të përgjegjshmërisë ndaj interesit të vendit.
“Ramush Haradinaj mund të ketë qindra gabime në qeverisjen e tij, por kur vjen puna të kjo çështje ka treguar që akoma te ai ka ndjenja të përgjegjshmërisë ndaj interesit të vendit të cilat Hashim Thaçit po i mungojnë. Hashim Thaçi po mbron me zell interesat e Serbisë dhe këtë duhet ndaluar të gjithë ne, pa marrë parasysh në cilat parti jemi”, ka deklaruar deputeti Haxhi Avdyli për gazetën “Bota sot”.