Për vetëm 6 muaj, Kuvendi ka shpenzuar 67 mijë euro vetëm për dreka zyrtare, ndërsa akomodimi i deputetëve në udhëtimet e tyre jashtë vendit, ka kushtuar 91 mijë e 187 euro.
E së fundmi Kuvendi ka miratuar dhe udhëtimet e disa deputetëve jashtë vendit, për punë që nuk kanë të bëjnë me Kuvendin.
Lidhur me këtë, hulumtuesi nga KDI, Eugen Cakolli, ka thënë për gazetën “Bota sot” se fenomeni i udhëtimeve të deputetëve me e pa arsye është kthyer në praktikë dhe ata nuk po e ndalin luksin, pavarësisht se Kuvendi ka çaluar në ushtrimin e funksioneve kushtetuese.
“Fenomeni i realizimit të udhëtimeve të deputetëve, vend e pa vend, me arsye e pa arsye, tashmë është kthyer në një praktikë për legjislaturat e fundit. Përkundër faktit se Kuvendi ka çaluar në ushtrimin e pothuajse të gjitha funksioneve të tij kushtetuese, sërish deputetët nuk kanë ndalur lukset e udhëtimeve jashtë vendit, që u sjellin atyre përfitime të konsiderueshme. Po ashtu, sistemi i kuotimit të vendeve për marrjen e mëditjeve, është faktor shtytës që ka ndikuar në rritjen e udhëtimeve. Edhe pse, vlen të ceket që legjislatura aktuale ka shënuar regres në aspektin e transparencës financiare, të dhënat tregojnë për shpenzime të mëdha në udhëtime jashtë vendit si dhe dreka apo darka zyrtare”, ka thënë Cakolli.
Sipas tij, sa i përket lejimit të udhëtimeve të paarsyeshme të deputetëve element është brishtësia e institucioneve dhe varësia nga votat e secilit deputet, derisa shton se nëse deputetët do të angazhuar në votimin e projektligjeve, kjo legjislaturë do të kishte rezultatet më të mira.
“Element tjetër që duhet përmendur në raport me lejimin e udhëtimeve krejtësisht të paarsyeshme të deputetëve është edhe brishtësia e institucioneve, dhe varësinë nga pothuajse secila votë e deputetëve. Kjo mund të ketë ndikuar që Kryesia e Kuvendit të aprovojë çfarëdo kërkese për udhëtime zyrtare. Kurse, nëse deputetët do të ishin të angazhuar dhe të përkushtuar në votimin e projektligjeve apo mbikëqyrjen e ekzekutivit, siç janë për realizimin e udhëtimeve, pa dyshim që legjislatura aktuale do të kishte shënuar rezultate dukshëm më të mira në aspektin ligjvënës dhe atë mbikëqyrës”, ka deklaruar Eugen Cakolli për “Bota sot”.
