Gruaja më e fuqinë më të madhe politike në Botë, Angela Merkel, njëherit mike e madhe e shtetit të Kosovës, ka njoftuar se nuk do të kandidojë për kreun e CDU. Ajo gjithashtu tregoi se ka marrë vendim që mos të kandidojë as për një mandat si kancelare. Kësisoj, Merkel e përfundon mandatin aktual pas 11 muajsh.
Merkel, e cila ka qenë kryetare e CDU-së që nga viti 2000, bëri të ditur vendimin e saj në një mbledhje me drejtuesit e partisë së saj. Por, jeta e saj politike mund të mos ketë mbaruar me kaq. Ajo ka thënë gjithnjë që sfida e saj e fundit ka qenë rimëkëmbja e Evropës. Në Berlin dhe në Bruksel është folur që ajo mund të jetë presidentja e parë femër e Komisionit Evropian, vitin tjetër, duke krijuar kështu një makro-Merkel që do të drejtojë një BE të reformuar, edhe pas Brexit-it. Kështu që, dorëheqja nga CDU mund të mos jetë fjala e fundit që dëgjojmë nga kjo politikane mbresëlënëse.
Me punën e palodhshme për ta parë një Evropë të rimëkëmbur, ajo të gjithë karrierën e saj ia kushtoi stabilizimit të situatave të cilat mund të eskalonin. Megjithatë, ngritja ekonomike ishte faktor kyç që Merkel e dëshironte në Evropë.
Si një mike e palëkundur e shqiptarëve, znj. Merkel ishte gjithmonë në krahun tonë, si një ithtare e së drejtës, duke pasur armiqësi me shtetet që nuk e donin Kosovën të pavarur dhe që i shkaktonin konflikte.
Shtetet sllave nuk e dëshironin Merkelin në këtë pozitë, për shkak që se kjo e fundit nuk i lejonte që me veprimet e tyre ta destabilizonin Evropën dhe Ballkanin dhe ta largonin atë nga binarët e proceseve Evropiane.
Angela Merkel e kundërshtoi ashpër idenë për korrigjim të kufijve mes Kosovës dhe Serbisë, duke e parë atë si një ide e rrezikshme për rajonin, që mund ta rrënonte gjithë mundin e ndërtimit të një procesi shumëvjeçarë, që në Ballkan të mbizotëron paqja dhe integrimi në Evropë.
Lajmit se Merkel do të tërhiqet nga posti i kancelares dhe nuk do të kandidojë më, padyshim se e kanë pritur me gëzim shtetet sllave në Ballkan, por gjithsesi edhe Rusia.
Por, fatkeqësisht këtij fakti po i gëzohet edhe presidenti i Kosovës, Hashim Thaçi. Krejt kjo pasi ky i fundi po punon dhe vepron në kundërshtim të Angela Merkel, dhe ajo po i del pengesë në aventurën e tij të rrezikshme e me interesa personale.
Madje, presidenti Thaçi ka kritikuar kancelaren Merkel njëzëri me kryeministren serbe, Ana Bërnabiç. Kështu të paktën ka thënë Shefi i Konferencës së Sigurisë së Munihut, Wofgang Ischinger.
Ai ka deklaruar se Presidenti i Kosovës, Hashim Thaçi bashkë me kryeministren e Serbisë e kanë kritikuar pozicionin e Gjermanisë sa i përket çështjes së dialogut me Serbinë.
Kështu që, është një ndjesi e keqe për të gjithë shqiptarët kur e dimë se një njeri nga tanët, bëhet së bashku me një serbe dhe kritikon mikun tonë shumëvjeçar.
Megjithatë, Kosova do të gjejë mbështetjen gjithmonë në SHBA, Britani, Gjermani. Pasardhësi i Merkel do të ndjek hapat e saj në politikat karshi Kosovës dhe Ballkanit.
