Deputeti nga radhët e Aleancës për Ardhmërinë e Kosovës, Muharrem Nitaj, ka thënë për gazetën “Bota sot” se Kosova ka bërë të pamundurën që të jetë pjesë e Interpol-it.
Ai ka thënë se beson se rezultati në ditën e votimit do të jetë pozitiv.
“Kosova ka bërë të pamundurën që ta realizojë të drejtën e vet për të qenë pjesë e Interpolit. Kryeministri Haradinaj ka muaj që e ka pasur pjesë të ngjeshur të agjendës së tij. Është bërë shumë punë dhe gjasat që vota pro Kosovës të jetë reale, ekziston. Megjithatë, duhet ta presim datën e votimit për të parë rezultatin. Unë dua të besoj se rezultati do të jetë pozitiv”, ka deklaruar deputeti Nitaj për “Bota sot”.
Ndryshe, për anëtarësimin e Kosovës në këtë organizatë botërore të sigurisë, do të votohet më 20 nëntor.