Dy ish-presidentët, Sali Berisha dhe ai kroat Stjepan Mesiç kanë zhvilluar sot një takim, ku kanë diskutuar për rajonin dhe idenë e ndryshimit të kufijve mes Kosovës dhe Serbisë.
Si dy nga politikanët e rajonit, protagonistë në zhvillimet në Ballkan pas viteve ’90, Berisha dhe Mesiç kanë shprehur qëndrimin kundër ndryshimit të territoreve në rajon. Ata e cilësuan idenë e rishikimit të kufijve si një katastrofë të re për Ballkanin.
Ish-presidenti Sali Berisha u shpreh se pavarësisht çfarë thuhet në media, qëllimi i ndryshimit të kufijve është zgjerimi i serbëve dhe krijimi i “Serbisë së Madhe”. Ai deklaroi se ndërsa kuptohen qëllimet e Beogradit, janë të turpshme deklaratat e kryeministrit Edi Rama dhe politikanëve të tjerë pro idesë së rishikimit të kufijve. “Rama dhe argatë të tjerë të Beogradit po i shërbejnë në mënyrë dashakeqe idesë serbe. Vuçiç deklaroi se nga kjo marrëveshje Serbia bëhet më e madhe dhe fiton më shumë territor. Mbrojta e kësaj ideje është fatkeqe dhe anti-kombëtare.
Gjithashtu ish-kryeministri theksoi se i tregoi Mesiç se pjesë për zbatimin e këtij projekti janë bërë dhe disa politikanë kosovarë dhe shqiptarë. “Veprimet e argatëve të Beogradit në Prishtinë që kanë marrë në dorë flamurin e Serbisë së Madhe, si dhe faktin që në Kosovë këta argat nuk i mbështet askush tjetër përveç listës serbe dhe dy tre argatë të tjerë. Por Kaosi që krijojnë është jo i vogël, bizare dhe e paimagjinueshme për mua është deklarata e kreut të qeverisë shqiptare, i cili u tha dje shqiptarëve 36 ditë pas vizitës dhe deklaratave të Vuçiçit në Kosovën e veriut se Serbia do të bëhet më e madhe, identike me deklarata e Millosheviçit në Gazimestan, dhe ky tani del e thotë se unë e kam mik atë, thotë se është një mik shumë i mirë dhe jam krenar që e kam mik. Një njeri që zbaton një projekt antishqiptar, një projekt fund e krye kundër paqes, dhe parimeve europiane të demokracisë bashkëpunimit dhe lirisë. Ne kishim një kuptim të plotë me presidentin Mesiç për çështjet që diskutuam”, deklaroi Berisha.
Ndërsa ish-presidenti Mesiç deklaroi se mbështetja e ideve për rishikimin e kufijve i kujton periudhën e Sllobodan Milosheviç dhe konfliktet e përgjakshme në Ballkan.
“Unë kam kënaqësinë e veçantë kur vij në Shqipëri dhe takoj presidentin Berisha. Më vjen shumë mirë sepse shumë herë takohemi dhe në konferenca ndërkombëtare. Gjithmonë i ka mbrojtur interesat e kombit të vet dhe asnjëherë nuk ka qenë kundër të tjerëve. Më vjen shumë mirë që sot kuptova dhe u njoha me kërkesat që janë aktuale për shkëmbimin e territoreve. Unë mendoj se dihet se shqiptarët i kanë institucionet e veta. Kosova është e pavarur ka institucionet e saj. Edhe unë besoj se asgjë nuk do të ndodhë që në serbi të realizohen dëshirat e Millosheviçit dhe as të Titos. Politika e Millosheviçit solli luftën e Jugosllavisë. Në luftën e fundit që ndodhi mbi 100 mijë dëshmorë ranë, fajtori kryesor ishte Millosheviçi. Katastrofë do të ishte nëse do të vazhdonin edhe sot politikën e Millosheviçit”, deklaroi Mesiç”,- deklaroi ish-presidenti Mesiç.
