Tre raste të ndryshme të dhunës në familje janë raportuar vetëm gjatë të dielës në rajonin e Prishtinës. Si rrjedhojë tre të dyshuar janë arrestuar dhe dërguar në mbajtje.
Rasti i parë, sipas Policisë, ka ndodhur në kryeqytet, ku një bashkëshort raportohet se vazhdimisht ka rrahur gruan e tij.
“Prishtinë 26.01.2019 – 23:00. Është arrestuar i dyshuari mashkull K/Shqiptar, i cili në vazhdimësi ushtron dhunë fizike ndaj bashkëshortes së tij viktimës femër K/Shqiptare. Nuk raportohet për të lënduar”, njofton PK-ja.
Rasti tjetër është denoncuar në Podujevë. Një grua raportohet të ketë kërkuar ndihmë mjekësore, pasi është rrahur nga bashkëshorti i saj, i cili më pas është arrestuar.
“Është arrestuar i dyshuari mashkull K/Shqiptar, pasi që i njëjti kishte sulmuar fizikisht gruan e tij viktimën femër K/Shqiptare. Viktima ka pranuar tretman mjekësor”, raporton Policia.
E rasti i tretë i raportuar gjatë 24 orëve të fundit, të dhunës familjare, në rajonin e Prishtinës, njoftohet të ketë ndodhur në fshatin Plemetin të Obiliqit.
Një viktimë, femër e komunitetit ashkali, bëhet e ditur se është sulmuar fizikisht nga njerku i saj. Për këtë ajo ka kërkuar edhe ndihmë mjekësore.
“Viktima femër ashkalike/shtetase e Malit të Zi, ka njoftuar se është sulmuar fizikisht nga njerku i saj i dyshuari mashkull K/Shqiptar. Viktima ka pranuar trajtim mjekësor ndërsa i dyshuari me vendim të prokurorit, dërgohet në qendrën e mbajtjes”, thuhet në kumtesën e PK-së.
Të tre të dyshuarit janë dërguar në mbajtje, thekson njoftimi.
