Prishtina s’e sheh zgjidhje karantinimin, por testimin masiv - Bota Sot
Prishtina s’e sheh zgjidhje karantinimin, por testimin masiv

Prishtina

Prishtina s’e sheh zgjidhje karantinimin, por testimin masiv

Më: 8 korrik 2020 Në ora: 00:46
Bujar Gashi

Drejtori i shëndetësisë në Prishtinë, Bujar Gashi, ka thënë se karantinimi nuk është zgjidhje, porse testimi masiv dhe masat të ndryshme.

1075 persona të prekur me COVID-19 në Prishtinë, deri më tani. Vetëm sot në kryeqytet rezultuan pozitivë 73 persona.

“Një shifër e pritshme. Do të ishte mirë që shifra e mbrëmshme të jetë një prej të fundit në këtë vlerë dhe të kemi më pak në këto shifra, edhe kjo e sotmja është mjaft e lartë. Por, edhe në nivel vendi është mjaft e madhe. Kjo e dërgon numrin e të prekurve në Prishtinë në 1075 raste dhe 815 raste aktive në momentin kur po flasim. Që nga 20 marsi deri më 31 maj kishim vetëm 85 raste, për dy muaj e dhjetë, ndërsa nga 2 qershori deri më tani, praktikisht i bie t’i kemi 990 raste”, u shpreh Gashi.

Sipas tij pat një hapje shumë të shpejtë në fazën e dytë dhe të tretë dhe dalje të shpejtë nga respektimi i rekomandimeve dhe mbetën tri rekomandime bazë që nuk u respektuan nga qytetarët.

“Në përgjithësi qytetarët e fituan një siguri më të madhe në vetvete dhe në atë se virusi thjesht nuk është asgjë, por ja që me kohën ndodhi e kundërta. Prishtina kërkoi vendosjen e masave qysh në fillim. Masat e marra në fillim ishin të suksesshme. Me kalimin e kohës filluam të kemi më shumë të njohura rreth virusit. Është kërkuar të ndalet gjurmimi i kontakteve. Tani testohen vetëm kontaktet e afërta të të prekurve dhe ata që kanë testime. Kjo ka ndikuar në evidentimin e rasteve. Kjo ka qenë ideja që të më tepër testime, dhe nëse prej 1 mijë testimeve do të kemi më shumë raste, por më shumë raste pastaj shkojnë në vetizolim dhe këtu këputet zinxhiri”, thotë Gashi.

Ai ka shtuar se të gjitha rekomandimet vazhdojnë të zbatohen, dhe nga aspekti mjekësor ai thotë se janë efektive.

“Kjo ndihmon pozitivisht në ndalimin e përhapjes së COVID-19. Rezultatet e këtyre masave do t’i shohim nga data 20 korrik. Çdo masë që merret dhe çdo mendim i ekspertëve është dhe ka qenë i arsyeshëm. Grupmosha më e prekur ka rezultuar të jetë 35-44 me 23 për qind, dhe ajo 25-34 dhe që të dyja bashkërisht përfshijnë rreth 45 për qind të qytetarëve të Prishtinës që janë prekur me koronavirus. Këto janë moshat që lëvizin më së shumti. Praktikisht është numër shumë i vogël i moshave të reja, dhe i atyre të vjetra që qëndrojnë në shtëpi”, ka thënë ai.

Ai ka paralajmëruar se nga java e ardhshme pritet të bëhen më tepër testime masive, përfshirë edhe ato serologjike.

“Njërën prej qendrave do ta shfrytëzojmë vetëm për testime dhe hulumtime. Forma e testimit mbetet ajo që është në fuqi, PCR për detektimin e rasteve aktive, por ne duam të bëjmë serologjike për të parë ato raste që e kanë kaluar COVID-19. Karantinimi nuk mendoj se është zgjidhje, masat e tjera janë të arsyeshme dhe duke parë se cila masë është duke e dhënë rezultatin e saj”, ka thënë Gashi.

Shfaq komentet
comments powered by Disqus
Sot mund të lexoni Shfletoni kopertinat