Përkundër rritjeve të rasteve me COVID-19 në Kosovë, një pjesë e qytetarëve vazhdojnë të mos respektojnë masat mbrojtëse ndaj virusit. Për këtë, Policia e Kosovës është duke vazhduar të gjobisë qytetarët të cilët nuk kanë të vendosur maska mbrojtëse.
Policët e Kosovës të cilët janë të angazhuar për menaxhimin e pandemisë COVID-19, po dënojnë qytetarët të cilët po lëvizin në sheshet e Prishtinës e nuk janë të pajisur me maska mbrojtëse.
Ndryshe, numri i personave të infektuar me COVID-19 në Kosovë ka arritur në 7 mijë e 652, prej tyre janë shëruar 4 mijë e 129 pacientë, ndërsa janë regjistruar 192 raste të vdekjes të cilët kanë pasur sëmundje tjera shoqëruese.
Aktualisht raste aktive me COVID-19 janë 3 mijë e 331.
