Qeveria e Kosovës në vendimin e saj të nxjerrë pas mbledhjes së datës 28 korrik, kishte shfuqizuar vendimin e 13 korrikut ku u pezullohej veprimtaria e çerdheve në institucione publike e private, ndërsa me gjithë paqartësitë e ditëve të fundit bëhet e ditur se disa çerdhe private nga nesër fillojnë punën.
Kështu është njoftuar përmes një postimi në Facebook, nga Asociacioni i Institucioneve Parashkollore Private (AIPP), ndërsa shumë çerdhe kanë shpërndarë këtë njoftim, duke bërë të ditur se do të nisin punën.
“Derisa në disa vende kanë filluar punën çerdhet/kopshtet, ju njoftojmë se hapja do bëhet sipas udhëzimeve institucioneve vendeve veç e veç”, thuhet në njoftim.
Ndërkaq, ditëve të fundit kishte paqartësi sa i përket hapjes ose jo të çerdheve private në Komunën e Prishtinës.
Këto paqartësi u krijuan pasi Qeveria e Kosovës la në përgjegjësinë e Komunave, hapjen e këtyre institucioneve.
Në lidhje me këtë kishte reaguar kryetari i Komunës së Prishtinës, Shpend Ahmeti i cili kishte thënë se çerdhet private nuk licencohen, nuk regjistrohen, nuk mbikëqyren dhe nuk hapen e mbyllen nga komunat.
Në këtë kohë pandemie Ahmeti thotë se është përgjegjësi e Ministrisë së Shëndetësisë dhe Arsimit funksionimi apo mosfunksionimi i tyre, por assesi e komunave.
Pas kësaj, Ministria e Arsimit, Shkencës dhe Teknologjisë ka dal me sqarim për media.
Në njoftim thuhet marrë parasysh situatën e krijuar me COVID- 19, të gjitha Institucionet publike (përgjegjëse), duhet të kontribuojnë në luftimin e pandemisë, që ndërlidhet pikërisht me përmbushjen e kushteve higjienike-sanitare.