Një zjarr ka shpërthyer në një kopsht fëmijësh në lagjen “Arbëria” në Prishtinë.
Lajmin e konfirmoi Afrim Gashi nga Njësia e Zjarrfikësve në kryeqytet.
Sipas Gashit, Zjarrfikësit janë informuar për një zjarr që ka shpërthyer në ora 15:16 në brendi të kopshtit “Shkronjat”, që gjendet në lagjen “Arbëria”.
Po ashtu, incidentin e ka konfirmuar për Kallxo dhe Arbenita Basha, drejtoreshë e kopshtit “Shkronjat”
Sipas Bashës, në fikjen e zjarrit kanë reaguar edhe stafi i kopshtit, i cili, sipas saj, ka qenë i trajnuar për situata të tilla.
Zjarri është shkaktuar nga kabllot e rrymës elektrike, te kutia e siguresave.
Zyrtari i Zjarrfikësve tha se fëmijët dhe personeli i kopshtit janë evakuuar me kohë dhe se askush nuk është lënduar. Këtë e konfirmoi edhe drejtoresha e çerdhes.
Zjarrfikësit janë kthyer në bazën e tyre.
Ndërkohë, në fotografitë që i ka dërguar një qytetar shihet ekipi i Zjarrfikësve me mjetet e tyre për fikjen e zjarrit në oborrin e kopshtit.