Kandidati i AKR-së për kryetar të Prishtinës, Selim Pacolli është tmerruar me gjendjen aktuale në të cilën gjenden pensionistët e Prishtinës.
Ai gjatë një takimi me ta ka parë nga afër gjendjen në të cilën ndodhen pensionistë. Madje ai tek ulej në tavolinë me ta pati edhe një pyetje për pensionistët, derisa ua premtoi objektin e ri pavarësisht nëse do të zgjidhet kryetar ose jo.
Pacolli ka thënë se ndjehet i turpëruar kur sheh ata që ndërtuan pallatet dhe infrastrukturën të cilën sot e gëzojnë ata që faktikisht e dinë gjendjen e mjerë të pensionistëve.
Pacolli: Kush iu ka shti në bodrum?
“Kush iu ka shti në bodrum?... Pavarësisht pozitës time ku do të gjendem unë nesër, do ta keni objektin më respektabil në Prishtinë. Iu premtoj që unë do të jem hija e kushdoqoftë ai i cilit do të jetë në krye të Prishtinës, do të jem hija e tij dhe derisa do ta nxjerri këtë lokal për juve nuk kam me i shkoq, nuk kam besuar që juve iu gjejë këtu”, është shprehur ai.
Përveç ambientit të bukur Pacolli pensionistëve iu ka premtuar edhe transport falas pasi sipas tij kjo nuk do të ndikonte në buxhetin e komunës së Prishtinës.
Ndërsa ai ka pasur një sugjerim për ish ministrin e Mirëqenies Sociale, njëherit kandidat i LDK-së për të parin e Prishtinës, Arban abrashin, duke thënë se po të ishte në vendin e tij nuk do të kishte ndërgjegje që prej një pozicioni të tillë të dilte dhe të kërkonte votën e qytetarëve.
Pacolli: Pensionistët do të kenë ambientin më të mirë të mundshëm
“Pensionistët do ta kenë ambientin më të mirë të mundshëm e thash edhe njëherë, mjeku do të duhet të jetë çdo dit me ju aty edhe do të jetë çdo ditë me ju...transporti sigurisht që do të jetë falas nuk është ndonjë buxhet që nuk mundet me arrit atë“, ka thënë Pacolli.
Ndërkaq, kryetar i degës së Sindikatës së Pavarur të Pensionistëve dhe Invalidëve të Luftës, Nezir Musliu ka thënë se pensionistët janë lënë pasdore krejtësisht. Për këtë ai ka kërkuar kushte më të mira duke përfshirë një barnatore enkas për ta, e cila do të ofronte barna pa pagesë për pensionistët, të cilët pothuajse gjatë gjithë kohës përdorin terapi mjekësore.
Musliu: Kemi me i përkrahë ata që kanë program më të mirë për pensionistët
“Është e përbuzur kjo shtresë, kjo gjeneratë e pensionistëve, nuk është marrë që sa vjet askush me ta, na u kanë shkel shumë të drejta që edhe pensionet e punës që kemi punuar 40 vjet nuk i gëzojmë, kemi gati njëfarë ndihme rregullt çka e marrim prej buxhetit të Kosovës tjetër nuk kemi por kemi disa kërkesa por ato themelore që janë, nuk kemi ku mu takua, nuk kemi lokal ku të përcjellim shtypin, ku të takohemi të luajmë shah... prandaj kërkojmë që mundësisht me pas një vend, një ndërtesë ku të takohemi dhe unë besoj që çdo kandidat që ofron program më të mirë për pensionistët ata kemi me i përkrah“, tha ai.
Pensionistja Hanife Vllasalia ka kërkuar që të ofrohen hapësira edhe për 2 mijë gratë pensioniste që i ka Komuna e Prishtinës në mënyrë që të kenë mundësi të rrinë me njëra tjetrën dhe të zhvillojnë aktivitete të ndryshme.
Pensionistët kërkojnë nga Selim Pacolli zgjidhjen e problemeve të tyre
Kandidati i AKR-së për kryetar të komunës së Prishtinës, Selim Pacolli, në kuadër të fushatës për zgjedhjet e 22 tetorit, është takuar sot me përfaqësues të pensionistëve dhe invalidëve të luftës, nga të cilët ka dëgjuar problemet me të cilat përballen ata.
Pacolli ka thënë se ka të vështirë të shohë pensionistët tek e presin në një bodrum për të biseduar me të.
"Unë po iu them se nuk e di me çfarë fytyre vijnë ata që kanë qenë para meje, sepse mua me vjen marre me ju pa këtu ku jeni tash. Nëse sot Qeveria e Kosovës i gëzon këto pallate, ju jeni ata që na i keni ofruar ato pallate, infrastrukturën. Unë nisem prej prindërve të mi, nuk do të kisha mund me i lënë këtu", ka thënë Pacolli.
Kryetari i Degës së Sindikatës së Pavarur të Pensionistëve dhe Invalidëve të Luftës, Nezir Musliu ka kërkuar barnatore enkas për pensionistët, e cila do të ofronte barna pa pagesë për pensionistët, të cilët pothuajse gjatë gjithë kohës përdorin terapi mjekësore.
"Gjendja e pensionistëve ka mbetur pas dore. Është përbuzur kjo gjeneratë e pensionistëve. Kemi kërkesa, por ato themelore që janë, nuk kemi ku të takohemi, të lexojmë shtypin, të luajmë shah. Unë besoj se çdo kandidat që ofron program më të mirë për pensionistë, atë do ta përkrahim", ka thënë Musliu.
