Edhe në komunën e Prizrenit ka filluar të zbatohet urdhëresa e Ministrisë së Tregtisë dhe Industrisë për verifikimin dhe etiketimin e mallit, si dhe përdorimin e flamurit mbi origjinën e produktit.
Kësisoj në marketet e kësaj komune, afër produkteve janë vendosur flamuj që tregojnë origjinën e produktit.
“Aksioni ka filluar që nga fillimi i kësaj jave nëpër të gjitha qendra tregtare, hipermarketet dhe marketet e komunës sonë, të cilët obligohen t'i përmbahen Ligjit për Mbrojtjen e Konsumatorit dhe udhëzimit administrativ të MTI-së”, thuhet në njoftimin e komunës së Prizrenit.
Vendimi për vendosjen e flamujve afër produkteve me qëllim të mbrojtjes së konsumatorit është marrë në bazë të Udhëzimit Adimistrativ që është nënshkruar nga ministri Endrit Shala më 29 dhjetor të vitit 2018.