Sëmundja e Parkinsonit është një nga sëmundjet më të shpeshta neuro-degjenerative.
Ende nuk dihet arsyeja se çfarë e shkakton këtë sëmundje, mirëpo ekspertët besojnë së ky çrregullim është një kombinim i një problemi gjenetik dhe disa faktorëve të ambientit të jashtëm. Ky kombinim shkakton dëmtimin e qelizave nervore të trurit, shkruan The Independent, transmeton Gazeta Express.
Çfarë është sëmundja e Parkinsonit?
Kjo sëmundje është një çrregullim degjenerativ nervor. Kjo do të thotë se simptomat me kalimin e kohës avancojnë. Një person, që bart këtë sëmundje nuk ka sasi të mjaftueshme të dopaminës në tru. Dopamina është një substancë përgjegjëse për transmetimin e sinjaleve në mes të qelizave nervore brenda trurit.
Cilat janë simptomat e kësaj sëmundje?
Simptomat kryesore të sëmundjes së Parkinsonit përfshijnë dridhje të pavullnetshme të gjymtyrëve, lëvizje të ngadalta dhe djegie të muskujve. Simptomat e tjera mund të jenë: insomnia, djersitje e tepërt, depresioni, ankthi dhe vështirësi në balancim të trupit.
Sa njerëz i prek?
Vetëm në Britaninë e Madhe kjo sëmundje i prek përafërsisht 145.000 njerëz. Kjo do të thotë se një në 350 njerëz jetojnë me këtë çrregullim. Sipas raporteve, simptomat e sëmundjes së Parkinsonit fillojnë të zhvillohen pas moshës 50-vjeçare. Meshkujt janë 1.5 herë më të rrezikuar nga kjo sëmundje.
Si mund të trajtohet?
Ende nuk është zbuluar ndonjë kurë efektive për shërimin e sëmundjes së Parkinsonit, gjithsesi simptomat mund të kontrollohen. Trajtimi më i shpeshtë për t’i mbajtur nën kontroll këto simptoma bëhet përmes barnave, të cilat kanë për qëllim rritjen e nivelit të dopaminës në tru.
Fatkeqësisht, barnat mund të kontrollojnë simptomat e sëmundjes së Parkinsonit, mirëpo nuk mund ta ngadalësojnë progresin e saj. Sipas ekspertëve ata të cilët vuajnë nga kjo sëmundje, mund t’i nënshtrohen ndërhyrjeve kirurgjike dhe fizioterapisë.
