Ju mund të kujdeseni për mirëqenien e foshnjës tuaj ndërsa është ende në bark. Si për shembull duke praktikuar aktivitet fizik dhe duke ndjekur një stil të shëndetshëm të ushqyerjes. Ky kombinim stërvitje dhe dietë në shtatzani – duket se mund të veprojë në ADN-në e fetusit, duke ndikuar pozitivisht me efekte të dobishme në shëndet pas lindjes. Kjo u demonstrua nga një studim i kryer në gratë shtatzanë me mbipeshë me probleme diabeti.
Rreziqet tek i porsalinduri nëse nëna ka diabet
Kërkimi u krye nga Universiteti i Southampton dhe King’s College në Londër dhe u botua në PlosMed. Qëllimi ishte të analizohej ndikimi i glukozës së lartë te nënat me diabet mellitus gestacional (i quajtur Gdm) dhe ndryshimet në ADN-në e të porsalindurve. Diabeti gjatë shtatzanisë në fakt është gjithnjë e më i shpeshtë në botë, edhe për shkak të shtimit të peshës mesatare dhe rritjes së stilit të jetës së ulur. Gruaja që vuan nga diabeti gjatë pritjes mund të pësojë më lehtë komplikime të tilla si hipertension, lindje e parakohshme. Madje edhe foshnja mund të ketë probleme shëndetësore, më vonë gjatë jetës, në lidhje me këtë sëmundje metabolike të nënës. Kjo sepse nivelet e larta të sheqerit në gjak të grave me diabet gestational shkaktojnë ndryshime epigjenetike në fetusin në zhvillim. Me fjalë të tjera, sheqernat e tepërta shkaktojnë ndryshime kimike në gjenet e fetusit, duke rezultuar në efekte të pafavorshme shëndetësore.
Efektet pozitive të jetës së shëndetshme
Studiuesit nga Universiteti i Southampton dhe King’s College në Londër pyetën nëse ishte e mundur të ndërhyhej me këtë mekanizëm, duke u përpjekur të zvogëlonin glukozën dhe, për këtë arsye, efektet e saj epigjenetike. Ata më pas studiuan të dhëna nga mbi 550 gra shtatzanaë mbipeshë dhe fëmijët e tyre. Një grup i grave u këshillua të merreshin me më shumë aktivitet fizik dhe të përmirësonin dietën e tyre gjatë shtatzanisë. Një grup tjetër, i mbajtur si një parametër kontrolli, përbëhej nga gra që nuk kishin bërë ndonjë ndryshim në stilin e tyre të jetës gjatë shtatzanisë.
Nënat e ardhshme që ndryshuan dietën e tyre gjatë shtatzanisë eleminuan ëmbëlsirat, ushqimet me yndyrë dhe ushqimet e pashëndetshme në përgjithësi, duke konsumuar më tepër fruta të freskëta, perime, peshk, drithëra dhe të gjitha ushqimet me një indeks të ulët glicemik. Ato gjithashtu rritën aktivitetin fizik ditor me ecje dhe gjimnastikë të moderuar. Rezultati ishte se shtuan më pak peshë, kishin sheqer më të ulët në gjak dhe kontroll më të mirë metabolik.
Foshnjat gjithashtu përfitojnë
Efektet pozitive të stërvitjes dhe dietës në shtatzani nuk ishin të kufizuara vetëm te nënat, por gjithashtu patën pasoja në shëndetin e fetusit, deri në moshën e rritur. Në fakt, në studim, studiuesit donin të verifikonin nëse një ndërhyrje në aktivitetin dietik dhe fizik gjatë shtatzanisë kishte sjellë këto ndryshime në fëmijët e lindur nga nënat me diabet gestacional. Ata më pas zbuluan se dieta e shëndetshme dhe stërvitja ulën ndjeshëm efektet negative të diabetit të nënës dhe nivelet e sheqerit në gjak në ADN-në e fetusit. Përmirësimet e dietës dhe aktivitetit fizik mund të kenë një ndikim pozitiv në zhvillimin e shëndetit të fëmijëve. Ekspertët tani do të vazhdojnë të hetojnë nëse zvogëlimi i ndryshimeve epigjenetike përmes një mënyre më të shëndetshme jetese gjatë shtatëzanisë shoqërohet me rezultate më të mira shëndetësore për fëmijët edhe pas disa vitesh.
Nëse jeni pak mbipeshë gjatë shtatzanisë, thjesht duhet të minimizoni ëmbëlsirat dhe sheqerin sa më shumë që të jetë e mundur dhe të ecni me shpejtësi gjysmë ore në ditë, që të kujdeseni edhe për mirëqenien e fëmijës.
