Ja tek cilët njerëz kanë pasur efekte pozitive bllokimet e Covid-19

Shëndetësia

Ja tek cilët njerëz kanë pasur efekte pozitive bllokimet e Covid-19

Më: 13 shkurt 2021 Në ora: 11:41
Ilustrim

Gati 1 vit pas fillimit të makthit të pandemisë, efektet negative të kufizimeve të vendosura për të na mbrojtur nga infektimi janë shumë të qarta:sidomos distancimi social dhe bllokimi, kanë pasur një ndikim të fortë në shëndetin tonë psikologjik, duke na bërë të ndihemi të trishtuar, të dëshpëruar dhe të rraskapitur.

Por fatmirësisht kjo nuk ka ndodhur me të gjithë. Sipas dy studimeve, i pari i botuar në Plos One dhe i dyti në pritje të rishikimit, për disa njerëz karantina ishte qenë një mundësi për të ndërmarrë ndryshime pozitive në jetën e tyre. Në studimin e parë, më shumë se gjysma e 3.000 skocezëve që morën pjesë, raportuan se kishin ndryshuar për mirë jetën e tyre gjatë bllokimit të pranverës së kaluar:83 për qind mësuan që ta vlerësonin më shumë atë që më parë e konsideronin si të mirëqenë.

Gati 7 në 10 persona thanë (paradoksalisht) se kishin shëtitur më shumë në natyrë (kush e di nëse ndikon fakti që skocezët mund të dilnin jashtë një herë në ditë, pa kufirin e 200 metrave larg nga shtëpia); më shumë se 50 për qind e tyre raportuan se ata i ishin përkushtuar më shumë aktivitetit fizik, dhe kishin kaluar më shumë kohë me partnerin e tyre.

Këto rezultate, janë në përputhje me ato të studimit të dytë, të kryer tek mbi 1000 australianë, ku 70 për qind e pjesëmarrësve raportuan se kishin përfituar të paktën nga një bllokim. Në fakt, ata patën më shumë kohë për të kaluar me familjen, më shumë fleksibilitet në punë dhe në përgjithësi ishin më pak të zënë me punë.

Në të dyja rastet, ajo që del me një qartësi ekstreme është rëndësia e kohës:ndalimi i papritur i aktiviteteve normale për shkak të masave kufizuese të vendosura për të përballuar përhapjen e pandemisë, na detyroi të reflektojmë se sa shpejt po ikin jetët tona. Gjatë bllokimit kemi pasur më shumë kohë të lirë, ndonëse shpesh nuk mund ta kalonim si dhe ku do të dëshironim. Gjithsesi shumë orë shtesë ishin një dhuratë e rëndësishme për t’u shijuar me familjen e tyre, ose për t’u përdorur për aktivitete që ishin shtyrë vazhdimisht.

Sigurisht, jo të gjithë kanë qenë në gjendje të vërejnë efektet pozitive të ngadalësimit paksa të ritmit të jetës, dhe marrjes së kohës për veten e tyre. Sipas studimit skocez, gratë, të rinjtë, të martuarit ose ata që bashkëjetojnë, janë ata që kanë përfituar më shumë nga bllokimi, sidomos ata që nuk kishin probleme shëndetësore kronike dhe që kishin një punë të sigurt.

Ndërkohë, të moshuarit, ata që jetonin vetëm, të papunët apo ata që ose kishin probleme shëndetësore, u prekën shumë nga kufizimet e vendosura, për shkak të pamundësisë për të parë të dashurit e tyre. Studiuesit skocezë zhvilluan një studim tjetër, për të zbuluar se si pjesëmarrësit në studimin e parë, kishin vazhduar jetën e tyre pasi u zbutën kufizimet. Rezultoi se jo vetëm që gjysma e subjekteve të analizuara kishin qenë në gjendje të mbanin zakonet e mira të fituara gjatë bllokimit të parë, si ushtrimet fizike apo një gjumë më të mirë, por disa prej tyre i kishin përmirësuar ato.

Me pak fjalë, jo e gjithë e keqja vjen për keq. Por le ta pranojmë, që nëse gjatë bllokimit të parë ne ishim në gjendje të vlerësonim kënaqësinë e të mosbërit asgjë, tani ditët e kaluara para televizorit nuk janë më një luks i së dielës, por një imponim (i nevojshëm) që në shumicën e rasteve, fillon të rëndojë nga ana psikologjike.

Shfaq komentet
comments powered by Disqus
Sot mund të lexoni Shfletoni kopertinat