Është një klasë enzimash, të quajtura E3-ubiquitin ligaza, siç theksohet nga studiuesit (kryesisht italianë) që morën pjesë në studimin ndërkombëtar. Përveç kësaj, është identifikuar një ilaç, Indole-3 Carbinol (I3C), i përdorur tashmë në trajtimin e sëmundjeve të rralla, i cili, për momentin in vitro, është parë “të jetë në gjendje të bllokojë daljen e virusit”, siç raportohet nga Giuseppe Novelli, gjenetist në Universitetin e Tor Vergata në Romë.
Falë një ekipi ndërkombëtar ekspertësh, ishte e mundur të identifikohej një mënyrë e re për të synuar koronavirusin, me përdorimin e një ilaçi që mund të ishte i disponueshëm në të ardhmen e afërt. Ndër protagonistët e kërkimit, Giuseppe Novelli, gjenetist në Universitetin Tor Vergata në Romë, autori i parë i studimit, rezultatet e të cilit janë botuar në revistën “Cell Death & Disease”.
Një klasë e enzimave të nevojshme për virusin për të dalë nga qelizat
“Në vend që të bllokojmë hyrjen e virusit në qeliza, u përpoqëm të kuptonim se si të bllokonim daljen e tij”, shpjegoi Novelli, siç thuhet në një artikull të botuar nga gazeta “La Repubblica”. “Kemi identifikuar kështu një klasë enzimash, të quajtura E3-ubiquitin ligaza, të cilat janë të nevojshme që virusi të dalë nga qelizat dhe të përhapet në indet e tjera të trupit”, tha gjenetisti. “Këto proteina nuk janë të virusit, por tonat dhe, për këtë arsye, nuk do të preken nga variacionet e virusit”, tha një nga autorët e studimit, mbështetur nga Fondacioni i Romës dhe i kryer në sinergji me ekspertë nga Spitali Bambino Gesù në Romë. Instituti Spallanzani, Universiteti San Raffaele në Romë dhe ato të institucioneve të ndryshme Amerikane, Kanadeze dhe Franceze.
Një ilaç i përdorur tashmë në trajtimin e sëmundjeve të rralla
Në punën e tyre, studiuesit ishin në gjendje gjithashtu, të tregonin se nivelet e këtyre enzimave janë të rëndësishme në mushkëritë e pacientëve dhe indet e tjera të infektuara me virusin. Prandaj, studiuesit identifikuan një ilaç të ri të mundshëm, të përshtatshëm për këtë qëllim. “Është Indole-3 Carbinol (I3C), i përdorur tashmë në trajtimin e sëmundjeve të rralla dhe që kemi treguar, për momentin in vitro, të jetë në gjendje të bllokojë daljen e virusit”, shpjegoi Novelli më tej. Fakti që “nëse parandalojmë ose edhe ngadalësojmë replikimin e virusit, gjithashtu mund të kompromentojmë mbijetesën e tij”. Rezultati i studimit, konfirmoi gjenetisti, përfaqëson një mundësi të rëndësishme për trajtimin kundër koronavirusit, “në veçanti për pacientët që nuk mund të vaksinohen”.
Një alternativë ndaj vaksinave
Sipas Pier Paolo Pandolfi, ekspert në Universitetin e Torinos dhe Nevada, i cili koordinoi studimin, “vaksinat, megjithëse shumë efektive, mund të mos jenë më aq në të ardhmen, sepse virusi shndërrohet, dhe për këtë arsye është e nevojshme të kemi më shumë armë për ta luftuar”. Për këtë arsye, zbulimi i “I3C është i rëndësishëm dhe tani duhet të fillojmë provat klinike për të demonstruar efektivitetin e tij të mundshëm”, tha ai.
