Çfarë është tumori në tru?
Tumori i trurit është një grumbull ose masë e qelizave anormale në tru. Kafka, e cila mban brenda trurin, është shumë e ngurtë. Çdo rritje brenda një hapësire kaq të kufizuar mund të shkaktojë probleme. Tumoret e trurit mund të jenë kancerogjene (malinje) ose jokanceroze (beninje). Kur tumoret beninje ose malinje rriten, mund të shkaktojnë rritjen e presionit brenda kafkës. Kjo mund të shkaktojë dëmtime të trurit dhe mund të jetë e rrezikshme për jetën.
Tumoret e trurit kategorizohen si primar ose dytësor. Një tumor primar i trurit e ka origjinën në tru. Shumë tumore primare të trurit janë beninje. Një tumor sekondar i trurit, i njohur gjithashtu si një tumor metastatik i trurit, ndodh kur qelizat e kancerit përhapen në tru nga një organ tjetër, siç janë mushkëritë ose gjiri.
Shenjat dhe simptomat e përgjithshme
Simptomat e tumoreve të trurit ndryshojnë në varësi të llojit, madhësisë dhe vendndodhjes së saktë në tru. Më poshtë janë disa shenja dhe simptomat më të përgjithshme.
Ndryshimet e dhimbjes së kokës
Dhimbjet e kokës që përkeqësohen janë një simptomë e zakonshme, që prek rreth 50% të njerëzve me tumore të trurit. Një tumor në tru mund të ushtrojë presion mbi nervat e ndjeshëm dhe enët e gjakut. Kjo mund të rezultojë në dhimbje koke të reja, ose një ndryshim në dhimbjet e zakonshme të kokës.
- Keni dhimbje koke të vazhdueshme, por nuk është migrenë.
- Koka ju dhemb më shumë në mëngjes kur ngriheni herët.
- Shoqërohet me të vjella ose simptoma të tjera neurologjike.
- Përkeqësohet kur ushtroheni, kolliteni ose ndryshoni pozicion.
- Ilaçet pa recetë për dhimbjen e kokës nuk ndihmojnë aspak.
Kriza nervore
Tumoret e trurit mund të shtyjnë qelizat nervore në tru. Kjo mund të ndërhyjë në sinjalet elektrike dhe të rezultojë në krizë nervore. Një krizë ndonjëherë është shenja e parë e tumorit në tru, por mund të ndodhë në çdo fazë. Rreth 50% e njerëzve me tumore në tru përjetojnë të paktën një krizë. Krizat nuk ndodhin gjithmonë nga një tumor në tru. Shkaqe të tjerë të tyre përfshijnë probleme neurologjike.
Ndryshimet e personalitetit ose ndryshimet e humorit
Tumoret në tru mund të prishin funksionin e trurit, duke ndikuar në personalitet dhe sjellje. Ato gjithashtu mund të shkaktojnë ndryshime të pashpjegueshme të humorit. Për shembull:
- Njerëzit, të cilët më parë komunikonin mirë, irritohen më shpejt.
- Bëhen pasivë
- Janë të relaksuar dhe të lumtur dhe më pas ndryshojnë dukshëm.
Këto ndryshime mund të ndodhin herët, por gjithashtu mund të ndodhin nga kimioterapia dhe trajtimet e tjera të kancerit. Ndryshimet e personalitetit dhe ndryshimet e humorit mund të jenë gjithashtu për shkak të çrregullimeve mendore, abuzimit të substancave dhe çrregullimeve të tjera që përfshijnë trurin.
Humbja e kujtesës dhe konfuzioni
Problemet e kujtesës mund të jenë për shkak të një tumori në lobin frontal. Një tumor në lobin frontal ose parietal gjithashtu mund të ndikojë në arsyetim dhe vendimmarrje. Për shembull, këta njerëz:
- mund ta kenë të vështirë të përqendrohen
- hutohen për gjëra të thjeshta
- e kanë të vështirë të bëjnë detyrat dhe të planifikojnë
- kanë probleme me kujtesën afatshkurtër
Lodhja
Lodhja është ndryshe nga ajo e zakonshmja. Njerëzit me tumor në tru mund të jenë të rraskapitur pothuajse gjatë gjithë kohës, të ndihen të dobët në përgjithësi, e gjejnë veten shpesh duke fjetur gjumë në mes të ditës, humbasin aftësinë për t’u përqendruar etj.
Depresioni
Depresioni është një simptomë e zakonshme midis njerëzve që kanë marrë një diagnozë të një tumori në tru. Edhe kujdestarët dhe të dashurit e tyre mund të zhvillojnë depresion gjatë periudhës së trajtimit. Kjo mund të paraqitet si:
- ndjenjat e trishtimit që zgjasin shumë dhe duken normale për situatën
- humbje e interesit ndaj gjërave që ju pëlqenin më parë
- mungesë energjie, probleme me gjumin, pagjumësi
- mendime për vetëdëmtim ose vetëvrasje
- ndjenja të fajit ose pavlefshmëri
Nëse keni disa nga shenjat dhe simptomat e listuara më sipër, sigurisht që nuk do të thotë që keni një tumor në tru. Meqenëse këto simptoma mbivendosen me simptomat e shumë kushteve të tjera, është e rëndësishme të merrni diagnozën e saktë. Përcaktimi i shkakut të simptomave është hapi i parë drejt trajtimit që ju nevojitet.
