Agjencia Evropiane e Barnave (EMA) ka nisur zyrtarisht shqyrtimin e vaksinës kundër Covid-19 nga prodhuesi kinez, Sinovac. Shqyrtimi do të shtrihet në aspektin e efektivitetit kundër Covid dhe sigurisë që paraqet për efektet anësore.
Ky, është hapi i parë i një pranimi të mundshëm të saj nga Bashkimi Evropian. Në rast të tillë, miliona qytetarëve në gjithë botën, do t’u njihet vaksinimi i kryer me dozat e Sinovac.
Sipas deklaratave nga EMA, ky vendim erdhi pas rezultateve preliminare nga laboratorët.
“Ky studim sugjeron se vaksina aktivizon prodhimin e antitrupave që luftojnë Covid-19. Ato, mund të ndihmojë të luftohet sëmundja”.
Për sa i përket lejimit për përdorim, ende nuk ka një vendim për këtë aspekt. Dozat e aprovuara deri më tani nga EMA, janë katër. Ajo Pfizer, Moderna, AstraZeneca dhe Johnson & Johnson.
Sinovac mund të bëhet kompania e pestë që aprovohet nga Evropa.
Një skenar i tillë, është mjaft i rëndësishëm edhe për Shqipërinë. Kjo, pasi vendi ynë ka vaksinuar mbi gjysmën e targetit me vaksinën kineze deri më tani. Nga 2.2 milionë doza të kontraktuara, rreth 1.2 milionë janë nga prodhuesi kinez.
Nëse Evropa vendos ta aprovojë këtë vaksinë, atëherë shqiptarëve mund t’u njihet lëvizja e lirë, në bazë të propozimit nga Komisioni Evropian, për lejimin e udhëtimeve për personat e vaksinuar.
