Mbyllet për 30 ditë një lokal në Shkup, pronari organizoi festë pa leje pune

Shkupi

Mbyllet për 30 ditë një lokal në Shkup, pronari organizoi festë pa leje pune

Më: 2 shtator 2020 Në ora: 19:27
Foto ilustrim

Edhe përkundër ndalesave dhe gjobave, sërish në shumë vende ligji dhe protokollet mbrojtëse kundër pandemisë nuk po respektohen. Një kafene në qendrën tregtare “Biser” në Shkup, mbrëmë i theu të gjitha protokollet, teksa organizoi një festë pa kontroll. Videot në rrjetet sociale treguan të rinj të mbledhur pa asnjë distancë teksa zbaviteshin, madje pinin nga e njëjta nargile.

Rastin në Inspektoratin Shtetëror të Tregut e lajmëruan qytetarët e shqetësuar pak para mesnate. Gjysmë ore më vonë, inspektorët shkuan atje dhe gjetën një sërë parregullsish. Përveç faktit që kishte kaluar orari i punës për baret, që në ditët e javës është deri në mesnatë, lokali madje ende nuk është i regjistruar.

Pronarit iu shqiptua akuzë për kundërvajtje dhe lokalit i ndalohet puna për 30 ditë. Meqë lokali nuk është i regjistruar, më tej me pronarin do të merret Ministria e Brendshme. Kjo nuk është shkelja e vetme e protokolleve ndaj Covid-19. Në shumë lokale nuk respektohet distanca dhe maskat, por deri tani, shumë pronarë kanë kaluar vetëm me paralajmërime.

Problem janë edhe dasmat dhe festat familjare që organizohen në oborre private e ku Inspektorati nuk ka juridiksion. ISHT i kërkoi Komisionit për Sëmundje Ngjitëse protokolle të caktuara për rastet e tilla, në mënyrë që të jenë në gjendje të kontrollojnë nëse masat respektohen ose jo.

commentFirst article
Sot mund të lexoni Shfletoni kopertinat